Претходен број

Матурантите подобро знаат англиски отколку македонски

Осум проценти од вкупно 17.006 матуранти не го положиле испитот по мајчин јазик

Жаклина Хаџи-Зафирова

Матурантите подобро го познаваат англискиот отколку македонскиот јазик. Само пет проценти од средношколците добиле петка по тестот за мајчин јазик, а ваква оценка по англиски имаат рекордни речиси триесет отсто од матурантите. Осум проценти од вкупно 17.006 матуранти не го положиле испитот по мајчин јазик, а најбројни се оние средношколци кои добиле тројки по овој предмет. Матурантите се покажале најлошо на тестовите по математика и по француски јазик, бидејќи околу триесет отсто паднале на овие испити.

Од Бирото за развој на образованието вчера излегоа со оцена дека очекувале вакви резултати на матурата, кои ги оценија како подобри од оние од пилот-матурата. Но, сеедно, тие се задоволни од исходот на двата екстерни испити што ги прегледуваа државните институции.

Родителите, наставниците и учениците се изненадени поради лошите резултати од матурата, поради кои набрзина спласнаа нивните високи очекувања. Дополнителен стрес на родителите им создадоа условите за поднесување приговор, бидејќи за еден испит родителот треба да плати 2.000 денари, но тие пари му се враќаат само ако се покаже дека бил во право. Во спротивно, државата ги задржува овие пари. Објаснувањето на надлежните е дека намерно поставиле вакви услови за да не приговара секој, а се повикуваат на странско искуство.

Прелиминарните резултати од испитот по мајчин јазик покажаа дека најмногу добиле тројки, поточно 38,4 отсто, а само 5,6 отсто од овој испит „однесоа“ петки.

Ако се анализираат посебно, тестовите по македонски, по албански и по турски јазик, ќе се види дека тројките се најчести оценки кај средношколците, а кај сите три јазици процентот се движи над 34 отсто. Најслабо со мајчиниот стојат учениците што ја следат наставата на македонски, при што само 5,1 отсто биле оценети со петка.

Високи се и процентите на оние што ги освоиле минималните 40 поени и добиле двојки и четворки, проценти кои кај учениците - Албанци и Македонци се движат над 20 отсто.

За разлика од мајчиниот јазик, учениците покажале солидни познавања по тестовите по англиски, по француски, по германски и по руски јазик. Генерално, најголем дел од матурантите кои полагале странски јазик се оценети со четворки. Земено посебно по јазици, петки по англиски добиле 28,8 проценти, додека триесет отсто имаат четворки. Но, затоа, исклучително лоши се резултатите од тестот по француски јазик, кој не го положиле 26, 4 проценти.

Лоши се резултатите и кај испитот по математика. Над 28 отсто од средношколците не го положиле испитот по математика - основно ниво, за што само 11 отсто биле оценети со петка, а повеќето имаат тројки. Вториот тест, математика - напредно ниво, не го положиле, исто така, висок процент, односно 12, 4 отсто од средношколците.

„Кога ќе ги споредиме резултатите од другите европски земји, каде што прв пат е спроведена државна матура, можеме сосема одговорно да кажеме дека нашата матура е сосема успешна“, изјави вчера директорката на Бирото за развој на образованието Весна Хорватовиќ.

Таа најави дека ќе направат анализа за да видат што довело до ваквите резултати. „Не би излегла со констатација дека учениците не го знаат добро мајчиниот јазик, туку треба да се направат анализи и да се види што предизвикало да имаме такви бројки“, рече таа, додавајќи дека кај македонскиот и кај странскиот јазик е различен потребниот праг за да се положи испитот, кој кај македонскиот е 40 поени, а кај странскиот - 30.

Хорватовиќ рече дека учениците нема да имаат увид во тестовите поради краткиот рок за вториот испит од матурата, кој ќе се одржи на 14 и 16 август. Таа вели дека средношколците ќе можат да ги видат резултатите на посебна веб-страница што ја изготвиле за матурата на www.matura.gov.mk со отчукувањето на името и презимето на кандидатот и неговиот матичен број.

„Тестовите се градени врз иста методологија како и за пилот-матурата. Очекувавме вакви резултати, бидејќи имаме искуство во образованието. Знаеме дека во Македонија учениците имаат интелектуален потенцијал, а образовниот систем не е толку лош да имаме катастрофални резултати на испитот“, смета Хорватовиќ. Таа потенцира дека откако ќе ги знаат конечните резултати од јунскиот испитен рок, на 26 јули ќе имаат согледувања кои наставници биле вистински објективни вреднувачи, а кои наградувале и казнувале.

Сепак, родителите вчера негодуваа околу резултатите од двата екстерни испита од државната матура. „Не сум задоволна од резултатите. Прво, не знам како ми го оценувале тестот и каде сум згрешила. Како може некој што три години полага еден испит сега да добие четворка по истиот предмет. Ние се знаеме меѓу себе и знаеме кој колку вреди и знае. Затоа, сметам дека мојот труд е девалвиран“, вели една средношколка. Родител на матурант се жали дека државата се обидува да им стави сопка на родителите со тоа што ги принудуваат да уплатат по 2.000 денари од испит ако се сомневаат во резултатите, а од друга страна, учениците нема да знаат за што да се жалат кога не знаат како се оценувани.

„Мислам дека децата ги искористија како експеримент. Постојано надлежните велеа дека ќе биде лесно, а сега излегува дека голем процент не ги положиле испитите. Сега не само што децата не знаат како се оценувани, туку за два-три бода нема да можат да се запишат на факултет. А сомнително е и како се оценувани, бидејќи имаше прашања за кои немаше поени и субјективно зависеа од волјата на наставниците“, смета родителот.

Директорот на средното училиште „Васил Антевски - Дрен“ Небојша Живковиќ вели дека матурата ќе го покаже вистинското знаење на децата и не крие дека на учениците им биле подарувани оценки.

Според него, повеќе фактори можат да влијаат на конечните резултати од матурата. „Или тестот им бил тежок на учениците или не соодветствува на наставната програма или, пак, оценките им биле подарени“, вели тој.