Во Гостиварско полни амбарите со жито
ГОСТИВАР - Годинешните приноси на пченицата и на другите житни култури во горно-полошкото поле се поголеми за 30 - 40 проценти во споредба со лани. Просечните приноси се движат меѓу 3.800 и 4.500 килограми на хектар, а рекордните достигнуваат и до 7.000 килограми.
„Задоволен сум од високите приноси и квалитетот на зрното на пченицата, јачменот, тритикалето и овесот“, вели Самоил Јаковлески, раководител на фармата „Штраус“ oд гостиварското село Зубовце, кој има 15 хектари со житни култури.
Тој додава дека жетвата ја почнале пред десетина дена, а во атарот на Зубовце очекуваат да завршат до крајот на неделава. За тоа што ќе прават со вишокот Јаковлески е категоричен, ако мелничарите не понудат цена повисока од 15 денари за килограм, тогаш житните култури ќе ги задржат како храна за ноевите и козите.
Во атарите на селата Градец, Неготино, Чегране, Форино жетвата е завршена, а на другите површини ќе финализира најдоцна до 25 јули.
„Годинава со житни култури во горно-полошкото поле беа засеани околу 3.000 хектари, што е за 20 отсто повеќе во споредба со 2007 година“, изјави Слободан Серафимовски, раководител на Агенцијата за поттикнување на развојот на земјоделството - Гостивар. Притоа, потенцира дека откупот на пченицата е минимален.
Земјоделците не се заинтересирани пченицата да ја продаваат по 13 денари за килограм и се закануваат дека родот ќе заврши во амбарите и за исхрана на добитокот, предупредуваат од Агенцијата за поттикнување на развојот на земјоделството. (К.К.) |
