Извештајот за трговијата со органи е веродостоен

Берн - Извештајот за трговијата на ОВК со човечки органи во Косово, за кој денес ќе се расправа на зимската сесија на Парламентарното собрание на Советот на Европа (ПССЕ), предизвика голем интерес бидејќи е „веродостоен и погодува точно во нерв“, изјави известувачот на ПССЕ за Косово, Дик Марти, во интервју за швајцарскиот печат.

Тој за весниците „Сонтагс цајтунг“ и „Ле матен диманш“ рече дека не дава докази за обвинувањата бидејќи „не е истражен судија“, туку само истражувач, а неговиот извештај, како што додаде, содржи многу точни детали.

Марти воедно изрази чудење поради вознемиреноста што ја предизвика неговиот извештај бидејќи речиси сите елементи веќе биле познати и нагласи „вистински скандал е што се затворани очите пред криминалните дејствувања на одделни кругови, кои се доведени на власт во Приштина“.

Тој потсети на известувањето на „Њујорк тајмс“ и на британскиот „Гардијан“ на оваа тема, со повикување на извештајот на ФБИ од 1999 година. „Шест години подоцна, германскиот неделник ’Шпигл‘, исто така, извести за трговијата со човечки органи“, додаде Марти. Жестоките реакции на неговиот извештај оставиле, според пишувањата на печатот, траги на Марти. „Не е едноставно да се биде обвинет за лажго и нацист“, рече тој по повод изјавата на Хашим Тачи во која швајцарскиот пратеник го спореди со Јозеф Гебелс.