Рибери пак повреден

Францускиот репрезентативец Франк Рибери го повреди зглобот на мечот со Хофенхајм во рамките на 5.коло од Бундеслигата. Баварците славеа со 2:1 (поведоа домаќините со голот на Ибишевиќ, а Милер и Ван Бајтен го завртеа резултатот), но овој момент ја намали радоста.

„Мислам дека повредата е прилично сериозна. Треба да се направат прецизни прегледи, па да знаеме за што точно се работи“, кажа разочараниот тренер Луис ван Гал.

„Првите проценки не ветуваат многу. Можеби долго време ќе биде надвор од теренот“, додаде Карл Хајнц Румениге, кој се сомнева во повреда на лигаментите на зглобот.

Напаѓачот на Келн Лукас Подолски остро го нападна тренерот Звонимир Солдо за неговата тактика во поразот кај Мајнц (0:2). „Ако играме вака не мора да изглегуваме на тревата. Воопшто не ризикуваме, не напаѓаме. На таков начин не може да се дојде до гол, а ниту до победа , или бод. Грешиме“, кажа искрено Подолски.

Од друга стран,а Мајнц ликува. Во пет меча има исто толку победи и сега веќе се одлепи на чело на табелата со пет бода повеќе од Хофенхајм и Хановер.