Летаат откази за дисциплинците на УЕФА

Робин Бокшиќ доби нога откако Платини нареди истрага за ширење лажни информации за низа клубови

Европската куќа на фудбалот ја прекина соработката со својот досегашен истражител Робин Бокшиќ, кој во последните денови стана селебрити фаца на фудбалската сцена.

Бокшиќ, како што наведуваат германските медиуми, добил отказ откако истрагата против него и неговиот надреден шеф на Дисциплинската комисија, Питер Лимахер, нареди лично претседателот Мишел Платини.

Лавината која почна да носи „животи“ со себе, ја покрена текстот во магазинот „Штерн“, кој споменатите двајца ги наведе како луѓе кои ширеле лажни информации за валканите работи на низа клубови, вклучувајќи го и големиот Баерн.

За баварскиот клуб ја прошириле информацијата дека, наводно, во 2008 година го наместил мечот со Зенит. Станува збор за реванш полуфиналниот натпревар од Купот на УЕФА, кој заврши со победа на Русите од 4:0 (во првиот меч беше 1:1).

По излегувањето на тој текст, Баерн реши да ги тужи Лимахер и Бокшиќ. Еден од челниците на Баерн, легендарниот Карл Хајнц Румениге, побесне и побара од УЕФА да не фрла прашина на светото германско фудбалско име.

„Не може ова туку така да помине. На некој му текнало дека сме местеле натпревар. Тоа нема никаква врска со вистината. Затоа ќе тужиме. Со Баерн не смее никој да се игра“, му се закани Румениге на Платини. Ваквиот развој на настаните повторно ги актуелизира дебатите за тоа дали некој свесно може да намести така голем клуб, или пак дали може некој помал клуб да се избори за неговата вистина како една величина како Баерн.

И тука кај нас веќе почнаа тие муабети, бидејќи токму Лимахер беше тој кој одлучуваше за случајот Победа. Како што е познато, Победа заработи осумгодишна суспензија на европската сцена поради лажирање на натпреварот со Пјуник. Оние кои се посомневаа во ригорозната казна на УЕФА (инаку прва шлаканица од таков вид за некој европски клуб), сега имаат плодна почва за своите тези дека малите риби не може да преживеат во базен со пирани.

Ништо чудно сега во јавноста да се јави и пропаднатиот во земја Александар Забрчанец со антикодошките пароли: „Што ви реков, допрва ќе се одмотува клопчето на нечесните игри со нас. Ни виновни ни должни го изедовме стапот“, може лесно да му се испушти на Забрчанец, чија жалба, за разлика од тужбата на Баерн, беше пеплосана. (Н.К.)