Во Белгија без Темелков, а со Маркоски
Повредениот Владимир Темелков ќе го пропушти следниот квалификациски натпревар за Европското првенство против Белгија, кој ќе се одигра в недела од 14,10 ч. во Херстал, а во составот се враќа залечениот Велко Маркоски. Десното крило Темелков одлично го почна мечот со Исланд во средата, кога постигна два гола пред да го повреди левото колено во еден дуел во 11. минута и повеќе не се врати во игра. Маркоски, пак, кој може да игра на позициите лев и среден бек, не беше во тимот поради настинка проследена со висока температура, поради што не тренираше пет дена.
Местото на Темелков ќе го заземе јуниорскиот репрезентативец на Металург, Гоце Георгиевски. Заедно со репрезентативните колеги денеска во Белгија ќе замине и десниот бек Влатко Митков, кој беше планирано по Исланд да се врати во Германија поради обврските спрема својот клуб Хам, но поради многуте проблеми со составот беше издејствувано да ја одигра и оваа средба. (Р.Д.) |
