Тимот од соништата на Ред бул останува заедно

Сопственикот Матешиц уверува дека двојната круна ќе ја бранат нејзините освојувачи

Сопственикот на Ред бул рејсинг, Дитрих Матешиц, е убеден дека тимот што го освои годинашниот шампионат во Формула 1 ќе остане заедно за одбрана на двојната круна во сезоната 2011. Имаше шпекулации дека Марк Вебер би можел да ја напушти екипата од Милтон Кинс откако во неколку наврати во текот на сезоната му префрли на тимот за фаворизирање на Себастијан Фетел. Матешиц, меѓутоа, инсистира дека „тимот од соништата“ ќе биде заедно и во следната сезона.

„Се разбира дека Марк ќе остане, нема сомневање во тоа“, изјави тој за „Аутоспорт“. „Целиот дрим-тим - можеби тоа е претерување, но јас мислам дека е вистина - ќе остане заедно. Успехот уште повеќе ги зближи и обедини сите во тимот. Би рекол дека нема ниту еден од врвот на нашиот тим што не добил барем една понуда од другите тимови. Не знам ниеден што прифатил. Никој не си дозволи да биде заведен. Сигурен сум дека тоа нема да се смени по освојувањето на двете титули. Како и да е, едно нешто е сигурно: во 2011 година другите ќе не' ловат, ние нема да бидеме ловци повеќе“.

Вебер веќе го предупреди новокрунисаниот шампион Фетел дека тој ќе биде подготвен за битка кога ќе се најдат во Бахреин в година.

„Мислам дека ако влезам во следниот шампионат со мисла оти ќе го следам Себастијан наоколу, тоа нема да биде вистинскиот начин“, изјави Австралиецот. „Се разбира, тој ја заслужи светската титула годинава. Знаеме дека таа можеше да отиде во четири раце во последната трка. Таа замина кај Себ, бидејќи тој го заслужи тоа. Стартуваме повторно од првата трка наредната година. Секако дека е природно да продолжам да се обидувам и да ги победувам сите. Дополнителна награда е ако можете да го победите момчето што го има истиот материјал како вашиот. Тоа е наградата во секој технички спорт. Себастијан се враќа како светски првак, така одат тие работи, но насочен сум кон следната сезона и кон обновувањето на битката. Повторно ќе ја почнеме борбата во Бахреин, но се' ќе биде ресетирано“. (Аутоспорт)