Претходен број

Почна битката за преговори во Брисел

Испорачајте ни резултати, ние ќе ви дадеме датум, била директната порака на состанокот на Советот за стабилизација и асоцијација, со сугестија, сепак, да го имаме предвид спорот со Грција: Карл Билд

Македонија треба да покаже неоспорен кредибилитет, бидејќи тоа ќе влијае и на поддршката околу спорот за името

Од нашиот дописник
Слободанка Јовановска

Брисел - Политичката битка за датум за преговори со ЕУ почна завчера во Брисел и без оглед на исходот Македонија наредните два месеца треба да покаже неоспорен кредибилитет, бидејќи тоа ќе влијае и на поддршката околу спорот за името. Ова, во една реченица, е поентата од состанокот на Советот за стабилизација и асоцијација прексиноќа во Брисел, на кој се повтори пораката дека ЕК е подготвена да предложи преговори со Македонија ако до пишувањето на извештајот во октомври земјата испорача доволно резултати да се оправда таа одлука.

„Не не' интересира пошироката политичка слика. Испорачајте ни резултати, ние ќе ви дадеме датум“, била директната порака на состанокот, со сугестија, сепак, да го имаме предвид спорот со Грција, иако за ЕК тоа нема да биде пречка да го направи потребниот чекор.

Впечаток е дека по две години игноранција, почна да се топи мразот на релација Македонија - ЕУ, па тоа егзалтирано го објави и еврокомесарот Оли Рен, нагласувајќи дека кредибилитетот на ЕУ сега бил голем во нашата земја откако вети укинување на визите и сега е на пат да го испорача тоа, со сугестија дека исто ќе биде и со датумот ако се исполнат условите.

„Направивте добар прогрес, иако се' уште има отворени прашања на кои работиме. Расправавме за можноста да го придвижиме регионот кон европските интеграции и за тоа воопшто нема дилема кај лидерите на ЕУ“, изјави шведскиот шеф на дипломатијата, Карл Билд, на прес-к��нференцијата. Тој не сакаше да се дефинира себеси како оптимист или песимист околу добивањето датум за преговори на Македонија, иако нагласи дека последните 20 години не се разишол со ниту една изјава или мислење на Оли Рен. „Сепак, морам да кажам дека треба да го почекаме извештајот на ЕК, бидејќи евроинтеграцијата е процес базиран на постигнувања“, рече Билд. На прашањето дали го гледа спорот околу името како пречка за одлуката, тој не одговори конкретно, туку ги повика двете земји да покажат вистинско чувство за компромис, бидејќи добивката од решавањето на проблемот ќе биде значајна и за Македонија и за Грција.

Досега лидерите на ЕУ се повикуваа на заемно прифатливо решение за спорот, но отстапките ги гледаа главно во Македонија, така што Билд е првиот кој по подолг период јасно побара отстапки и од Грција, која сега има разнишана позиција во однос на таа пред Букурешт, а не и' оди во прилог ни словенечкото вето за Хрватска.

Министерот Антонио Милошоски, кој ја предводеше македонската делегација, изјави дека Владата е мотивирана и подготвена да ги исполни преостанатите услови за да и' даде аргументи на ЕК да ја донесе одлуката за преговори. Прашан зошто досега не го стори тоа, место да ги чека последните рокови, Милошоски одговори дека осумте услови не се нешто што требаше да се исполни за неколку месеци, туку да биде резултат на едногодишна работа. „По изјавата на еврокомесарот Рен дека листата со услови сега е пократка, евидентно е дека прогресот е значаен и конкретен. Сега сме во финалната фаза од исполнувањето на условите“, изјави Милошоски, негирајќи потоа дека нема слобода на медиумите во земјата, туку обратно - дека се' поголемиот број медиуми зборува дека во овој простор има се' поголема критичност и независност, иако во оцените на ЕК стоеше сосема спротивно.