Владата не попушта за бугарските таблички

Сопствениците се жалат дека замената на постојните таблички со македонски е прескапа инвестиција за нив

Александрија Стевковска


Владата нема да ја измени или да ја одложи законската обврска странските возила да се облечат со македонско руво преку нивна пререгистрација. Иако замената на постојни��е таблички на возилата со македонски е прескапа инвестиција за нивните сопственици, Владата нема намера да отстапи или да ги видоизмени своите одлуки, без оглед на најавените протести.

„Владата првпат во однос на секоја досегашна влада овозможи оваа категорија граѓани да си го решат прашањето, со тоа што им даде повеќе од шест месеци рок да си ги легализираат возилата. Потоа се побара тој рок да биде продолжен, бидејќи завршуваше во текот на годишните одмори. Имавме слух за тоа и рокот се продолжи до крајот на септември. Државата го направи максимумот и редно е и граѓаните да го направат она што државата ќе ја отслика како држава во која владеат ред и закони“, посочи Груевски.

Инаку, за денеска е закажан протест на сопствениците на возила со странски таблички во Скопје, а поддршка на протестот ќе им дадат и бугарската ВМРО на Красимир Каракачанов, кои најавуваат протести на бугарско-македонската граница поради, како што велат, проблемите што им ги создава македонската Влада на граѓаните што поседуваат бугарски возила.

Во партиското соопштение, кое го пренесува бугарската агенција „Фокус“, се вели дека протестот е против македонската Влада, затоа што ги терала сопствениците на вакви возила да ги променат бугарските со македонски регистарски таблички. Партијата на Каракачанов го поддржува и протестот во Скопје, кој почнува денеска напладне пред Владата, за потоа да продолжи пред Собранието.

Сопствениците на бугарски автомобили се револтирани од владиното решение до крајот на септември да мораат да ги пререгистрираат своите возила. Се жалат на енормно високите цени за пререгистрација на возилата и на заканата дека ако не го направат тоа, возилата, во крајна линија, ќе им бидат одземени. Сметаат дека ваквото владино решение е спротивно на Уставот, кој гарантира можност во земјава да се возат и странски возила. Организаторите на протестот се плашат да се појавуваат во јавноста и прифаќаат да зборуваат само телефонски и анонимно.

Според нив, во Македонија има околу 50 илјади возила со странски таблички, од кои, ако се платат сите давачки за пререгистрација, државата ќе ќари околу 100 милиони евра. Затоа, едно од нивните клучни барања е ослободување од дел од давачките. Предлагаат, наместо сите давачки, за царина, ДДВ, акцизи и хомологација, да плаќаат само за осигурување и за регистрација.

Легализација требаше да се случи уште пред шест месеци, но Владата им даде нов рок до крајот на септември.