Згорчено чествувањето на Рожен

Oколу 350 Македонци вчера на Роженскиот манастир ја одбележаа 95-годишнината од убиството на Јане Сандански. На чествувањето присуствуваше десетчлена делегација на Македонците од Грција, но бугарската полиција го спречи присуството на делегацијата на Светскиот македонски конгрес и на Сојузот на здруженијата на Македонците од Егејскиот дел. На граничниот премин Делчево - Станке Лисичково македонската делегација била оневозможена да влезе во Бугарија, со образложение за „нечитлива буква во сообраќајната дозвола“. Во вториот обид за влез во Бугарија со друго возило делегацијата била пуштена, но кај Симитли, минибусот повторно бил запрен од полиција и вратен во Благоевград каде што ги задржале четири часа, бидејќи „возачот не носел сигурносен појас“. По плаќањето на глобата, делегацијата се вратила во Македонија.

„Очигледна беше намерата на бугарската полиција. Со коментарите ’вие можете да го продолжете патот, но не и возилото со кое патувате‘, не' вратија во Македонија. Сметавме дека Македонија на исток граничи со ЕУ, но Бугарија не се одлепила од минатото. Полицијата по девет часа малтретирање не' спречи да присуствуваме на чествувањето. Вложивме вербален протест кај началникот на сообраќајната полиција во Благоевград поради попречувањето на слободата на движење“, изјави Тодор Петров, претседател на СМК. (МИА)