Вмровскиот институт контра амандманот за приватизацијата

Политички маркетинг и правно неиздржан предлог се епитетите што ги доби идејата на СДСМ за уставни измени, со цел да не застаруваат кривичните дела поврзани со приватизацијата. Учесниците на вчерашната трибина што ја организираше институтот „Павел Шатев“, инаку близок до ВМРО-ДПМНЕ, посочија дека македонското казнено законодавство не го познава терминот „застарување на кривичната одговорност“ и оти единствено може да застари гонењето или извршувањето на казната.

Иако ВМРО-ДПМНЕ го прифати предлогот на СДСМ за ревизија на сомнителните приватизации, сепак, експертите што беа поканети на трибината на вмровскиот институт сметаат дека се изигрува јавноста со користењето термини што не ги познава нашето кривично право.

Социјалдемократите реагираа на трибината оценувајќи дека е очигледно оти владејачката партија се плаши и не сака да се расчистат прашањата поврзани со приватизацијата. За нив е доволен доказ тоа што на трибината не бил повикан ниту еден нивен член.

Според професорот на Правниот факултет, Владо Поповски, предлогот на СДСМ има повеќе маркетиншко-политички карактер отколку правна издржаност.

„Зошто досега Обвинителството или судовите не се осмелија да се впуштат во проверка на приватизацијата, во периодот кога тие дела не беа застарени. И зошто СДСМ смета дека ако се донесе уставната измена ќе се смени таквата состојба“, праша Поповски. Според него, евентуалното менување на Уставот ќе има ефекти за дела што не застареле, додека застаре��ите кривични дела тешко може да оживеат во правна смисла.

„Кога веќе зборуваат за нашиот уставен амандман логично е да повикаат и претставник на СДСМ. Нема поголемо лицемерство од тоа вечниот функционер во сите влади, Владо Поповски, кој беше министер и во времето на, како што вели Груевски, ’криминалната приватизација’, да го оценува уставниот амандман како политички трик“, возвратија од опозицискиот штаб.

Професорот Ѓорѓи Сламков рече дека лично би сакал да не застаруваат кривичните дела поврзани со приватизацијата, но оти како кривичар мора да каже дека тоа е неостварливо, бидејќи принципот на законитост не дозволува ретроактивно дејство на законот.

„Голема правна несигурност ќе донесе нормата што ја носиме денеска, а важи за вчера“, предупреди Сламков. (A.M.M.)