Не сакам да давам комплименти, но Охрид е посебен град
Италијанскиот композитор Енио Мориконе, на вчерашната средба со новинарите, рече дека е задоволен што токму во Македонија ќе одржи концерт
Тина Иванова
„Очигледно е дека јас сум презадоволен што сум во Македонија, но сепак, морам тоа да го кажам“, рече големиот италијански композитор Енио Мориконе, кој вчера претпладне, пред почетокот на свеченото отворање на „Охридско лето“, одржа прес-конференција во хотелот „Метропол“, каде што е сместен во тамошниот претседателски апартман. Рече дека за него претставува големо задоволство што токму тој со неговата музика ќе го отвори фестивалот.
„Го слушнав хорот на Македонската опера и балет и добив одличен впечаток. Сигурно вечерва ќе имаме добра изведба. Иако не е едноставно да се настапува на отворено, но се надевам дека звукот ќе биде добар и фокусиран. Би сакал овој концерт, кој е од големо, емотивно значење за публиката, да помине добро, зашто публиката ја сака музиката“, рече Мориконе. Тој го најави и изненадувањето за крајот на концертот, настапот на селекторот за музика на „Охридско лето“, обоистката Гордана Јосифова-Неделковска.
Филмскиот композитор завчера имаше и прием кај македонскиот претседател Ѓорѓе Иванов, кој е покровител на фестивалот „Охридско лето“. Мориконе истакна дека многу му е важно што имал средба со претседателот, кој го наградил со Медал за заслуги за Македонија, за што тој јавно му се заблагодарува. „Ова не е само предмет за носење, туку се работи за една голема чест која мене ми е дадена, па концертот ќе му го посветам на претседателот“. Инаку претседателот Иванов побарал од композиторот да одржи еден концерт кој ќе го посвети на Македонија.
Мориконе истакна дека Македонија е убава земја, особено Охрид. „Кога ја преминав албанско-македонската граница, знаев дека ова е посебен град. Јас не сакам да давам многу комплименти, но ова е навистина убав град“, рече Мориконе.
На прашањето што му се допаднало од македонската кујна, Мориконе рече дека немал некои посебни барања зашто не ја познава македонската кујна, но дека тоа што го јадел, салати и јагнешко месо, било одлично.
Директорот на „Охридско лето“, Тони Симоновски, на вчерашниот прес му врачи охридска резба со ликот на Св. Климент, патронот на градот Охрид. „Не го очекував овој гест, оваа прекрасна скулптура ќе ја носам дома. Обожувам дрво“, рече Мориконе.
Италијанскиот композитор, чие име најчесто се врзува за вестерн филмовите, рече дека од неговите дела, кои се околу 460, 80 насто се дела наменети за вестерн филмови. Но, рече, оној кој се сеќава само на вестерн филмовите е доста ограничен. „Јас би го искарал. Зашто, сум направил музика за многу важни филмови кои не се вестерн. Не дека не го сакам тој жанр, но ги преферирам сите музички жанрови. Сепак, и покрај компонирањето на различните филмови, композиторот треба да го задржи својот стил, својот печат“, истакна Мориконе.
На вчерашната средба со новинарите присуствуваше и министерката за култура Елизабета Канческа-Милевска, која меѓудругото рече големо е задоволството што во прегратките на македонскиот симбол на древноста, културата, историјата, сегашноста и иднината, дочекавме светски имиња. „Присуството на Мориконе годинава говори дека Македонија и во иднина ќе биде дом на големи, светски признати имиња од областа на музиката, театарот и уметноста воопшто. ’Охридско лето‘ со настапот на овој уметник ја збогатува својата и онака квалитетна програма и потврдува дека е една отворена сцена чија единствена константа е постојаната метаморфоза на случувања“, истакна Канческа-Милевска. |
