И јуни ќе биде без датум за преговори

Без решение за името, нема почеток на преговорите, вели европарламентарецот Јоргос Кумуцакос

Од нашиот дописник
Тони Гламчевски

Стразбур - Во Стразбур европратениците не веруваат многу дека Македонија ќе го добие датумот за преговори на идниот јунски самит на ЕУ. Словенечкиот европратеник Јелко Кацин завчера рече дека нема одговор на прашањето дали Македонија ќе добие датум за преговори во текот на годинава. Но, тој мисли дека со храброста со која сега се соочува Грција со економските тешкотии, нејзиниот премиер покажа дека е способен да донесе историски одлуки кои понатаму ќе го стабилизираат овој дел на Балканот. Кацин се надева дека и македонската страна ќе биде во состојба да одговори на адекватен начин.

Но, грчкиот европратеник Јоргос Кумуцакос и поранешен портпарол на грчкото Министерство за надворешни работи смета дека неговата земја нема да ја подигне блокадата за давање датум за почеток на преговорите на Македонија со ЕУ. Поранешниот портпарол на Дора Бакојани ги поздравува зачестените средби меѓу премиерите на Македонија и Грција, оценувајќи ги како нешто позитивно. Но, тој не гледа ништо конкретно за да извлече заклучок дека може да очекуваме решение на проблемот околу името во наредните месеци. „Засега имаме средби и разговори, но нема такви промени во позициите што би не довеле до заклучокот дека нештата ќе се променат радикално.“

Грчкиот европратеник од редовите на Нова демократија не верува многу дека социјалистичката влада на Папандреу ќе даде зелено светло за датум за преговори за Македонија. „Се' додека прашањето за името останува такво какво што е сега, мислам дека нема да има промена во грчката позиција“, вели тој.

Моментно владата на Папандреу, која донесе многу непопуларни економски мерки на штедење за излез од тешката криза, според Кумуцакос, не може да си дозволи една друга „тешка“ одлука, која не би била прифатена од мнозинството Грци. Тој тука мисли на одлука да и' се дозволи на Македонија почеток на преговорите, без притоа да биде решен проблемот со името.

Проблемот со името, според Јоргос Кумуцакос, не може да се поврзе со меѓуетничките тензии во Македонија, кои постојат одамна, тие се предизвикани од сили во земјата и смета дека Владата од Скопје може да ги надмине.

Интересно е дека Кумуцакос пред извесно време му се обрати на еврокомесарот за проширување Штефан Фуле да побара од него објаснување зошто тој го користел уставното име на нашата земја, во едно интервју дадено за македонските медиуми. Ова интервју предизвикало реакции и длабока непријатност во Грција, пишува Кумуцакос. Тој го прашува Фуле дали неговите изјави се во рамките на институционалните функции на комесарот задолжен за проширување и дали сведочат за „волјата да се промени досегашната политика, следена доследно на кохерентен начин од Европската комисија во однос на прашањето за името“. Според грчкиот европратеник, користењето на уставното име на нашата земја од еден официјален претставник на ЕК изгледа како отворено заземање страна и дека тоа е флагрантно кршење на принципот на солидарност кон една држава-членка на ЕУ.

Во одговорот, кој многу брзо дојде лично од страна на Фуле, тој го уверува грчкиот европратеник дека политиката на Европската комисија околу ова прашање не е променета и дека Комисијата им дава целосна поддршка на напорите што имаат цел да се најде заемно прифатливо решение под покровителство на ООН. Користењето на уставното име еврокомесарот Штефан Фуле го правда со фактот дека интервјуто било дадено за национален телевизиски канал и во никој случај не претставува прифаќање или критика на позициите на една од страните во конфликтот.