Лошите економски прогнози ја паднаа цената на нафтата

Нафтата на вчерашните тргувања на светските берзи поевтини за повеќе од еден долар, како резултат на зголемената загриженост на инвеститорите од песимистичките прогнози за растот на американската економија во текот на оваа година.

Цената на американската „лесна“ нафта за испорака во август на Њујоршката берза се намали за 1,23 долари и достигна 94,18 долари за барел, по нејзиното завчерашно поскапување за повеќе од еден долар. Во исто време, на Берзата во Лондон европскиот „брент“ завчера претпладне поевтини за 1,16 долари и стаса до 13,05 долари за барел.

Загриженоста на берзите ја предизвика и изјавата на претседателот на американската Управа на федералните резерви (ФЕД), Бен Бернанки, дека растот на економијата во САД е помал од очекуваниот и оти зголемувањето на БДП во 2011 година ќе изнесува 2,9 проценти наместо досегашните прогнози од 3,3 отсто.

Бернанки најави дека ФЕД нема намера да продолжи со примената на програмата за откуп на државни хартии од вредност, која, според аналитичарите, е најзаслужна за зголемувањето на американската ликвидност, но и за растот на цената на нафтата.

Аналитичарите оценуваат дека драстичното зголемување на цената на нафтата во мај на речиси 115 долари за барел, пред се', се должи на зголемената побарувачка на енергенсот во земјите со забрзан економски развој, особено во Кина, која е втор по големина потрошувач на црното злато во светот, по САД. (МИА)