Ја надмина Европа според бројот на милионери

Азија во 2010 година прв пат имаше поголем број милионери од Европа и брзо се приближува до првопласираната на оваа листа, Северна Америка, покажа вчера објавениот извештај на организацијата „Ворлд велт рипорт“.

Во него се наведува дека во Азиско-пацифичкиот регион во 2010 година живееле 3,3 милиони луѓе со богатство поголемо од еден милион долари, не сметајќи ја вредноста на нивните домови, што е за околу десет отсто поголема отколку претходната година.

Благодарение на економскиот раст во земјите со најголем број жители, Азија ја надмина Европа, каде што бројот на милионери лани порасна за шест отсто на 3,1 милион. На прво место и натаму е Северна Америка со 3,4 милиони богаташи, или 8,6 отсто повеќе отколку во 2009 година.

„Сосема е реално Азија во блиска иднина да ја надмине и Северна Америка според бројот на милионери“, се наведува во извештајот.

Кога станува збор за бројот на милионери по држави, во водство се САД, пред Јапонија, Германија и Кина. Кина лани имала 535.000 милионери, или 58.000 повеќе отколку во 2009 година.

Иако Азија дури лани за прв пат ја надмина Европа според број на милионери, вкупно богатство на азиските милионери веќе неколку години е поголемо од она на европските. (МИА)