Федерер во Стокхолм го стигна Сампрас

Швајцарецот Роже Федерер ја забележа 64. турнирска победа во кариерата по победата во финалето во Стокхолм над Флоријан Мајер од Германија со 6:4, 6:3. Со овој триумф Федерер се израмни со Американецот Пит Сампрас по бројот на освоени титули на четвртото место на вечна листа. Повеќе освоени турнири од нив двајца имаат Џими Конорс (109), Иван Лендл (94) и Џон Мекинро (77).

„Одиграв одличен турнир. Имав сериозни дуели во четврт-финалето, полуфиналето и финалето и успеав. Овде дојдов по петте натпревари во Шангај минатата недела, задоволен сум што ја потврдив добрата форма“, рече Федерер.

Ова е трета турнирска победа за него во 2010 година. Претходно ги понесе трофеите од Австралија опен и Синсинати.

Москва. Белоруската тенисерка Викторија Азаренка и Србинот Виктор Троицки се победници на ВТА и АТП-турнирот „Куп на Кремљ“ во Москва. Во женското финале Азаренка славеше над Марија Кириленко со 6:3, 6:4. За неа ова е втор турнирски триумф сезонава со кој си обезбеди место на завршниот тениски настан на најдобрите во Доха.

Во машкото финале, пак, Троицки го совлада четвртиот носител Маркос Багдатис со 3:6, 6:4, 6:3 за прв АТП-трофеј во кариерата на српскиот тенисер.

Луксембург. Италијанката Роберта Винчи е победничка на 220.000 долари вредниот турнир во Луксембург. Во мечот за титулата таа беше подобра од Германката Јулија Гергес со 6:3, 6:4 и така стигна до третата турнирска победа во кариерата.