Со Естонците без Ангелов

Даскаловски замена за повредениот голман на Металург на стартот од квалификациите за ЕП

Роберт Димитриевски

Петре Ангелов нема да го чува голот на македонската ракометна репрезентација на стартот од квалификациите за Европското првенство 2012 утре од 17,15 ч. против Естонија во СРЦ „Кале“, а најверојатно ни на 31 октомври против Босна и Херцеговина во Сараево. Голманот на Металург доби поштеда од новиот селектор Звонко Шундовски и не настапи на „Трофеј Карпати“ во Романија, а повредата на ногата е од таква природа што тој нема да може да го почне ни новиот квалификациски циклус. Неговото место ќе го заземе повремениот репрезентативец Златко Даскаловски од Вардар про, кој беше во Орадеа и кој ќе им биде конкуренција на Борко Ристовски и на Никола Митревски.

Шундовски, кој го наследи Љубомир Савевски по неговата оставка непосредно пред заминувањето за Романија минатиот вторник, конечниот список од 16 ракометари за дуелот со Естонија ќе го соопшти денеска. Како што вети новиот кормилар на националниот тим, костурот ќе го сочинуваат играчите што на Македонија и' го донесоа 11. место на Светското првенство минатата година во Хрватска и во него е придодаден Ванчо Димовски, кој не беше на списокот на Савевски. Од ракометарите што беа испробани во Орадеа извесно е дека ќе отпаднат Ојлески, Стојчевски, Шалевски, Манасков, Ѓоргоноски, Кузманоски... За дебитантот Ристо Арнаудовски од Босна, Шундовски смета дека е нов и оти допрва треба да се наметне.

Ристовски, Алушовски, Миркуловски и Наумче Мојсоски, кои не учествуваа во освојувањето на третото место на „Трофеј Карпати“, сигурно ќе бидат во составот за мини-циклусот од две квалификациски средби. Вчера на државната селекција и' се приклучија и интернационалците на чело со капитенот Кирил Лазаров.

Шундовски очекува победа над Естонците, кои се „непознат противник што никогаш не сме го победиле на гости“. Победа во сите три натпревара дома, плус бод или два од гостински терен, е формулата за успех во квалификациите на тренерот на Пелистер, кој се врати во репрезентацијата како главен во Стручниот штаб откако му беше помошник на Иле Темелковски лани во Хрватска.

Прв фаворит во нашата група е Унгарија, а на ЕП во Србија ќе има место за освојувачите на првите две места.