Во следните два месеца „Бучим“ во мирување
Во рударската дејност веќе се чувствуваат последиците од економската криза, се отпуштаат работници или, пак, се редуцираат трошоците во работењето. Постојаниот пад на цената на бакарот на берзите ќе остави без работа 480 работници од рудникот „Бучим“.
Се' до февруари идната година производството во компанијата ќе биде ставено во мирување, а ќе бидат ангажирани само минимален број работници, информира вчера Николајчо Николов, од менаџерскиот тим на „Бучим“. Тој рече дека во првите три квартали остварилe рекордно производство и позитивни резултати, но последниот, четврти, бил погубен поради драстичниот пад на цената на бакарот од 8.000 на 3.000 долари за тон.
„Бараме помош од Владата, пониска цена на електричната енергија и на екстра-лесното гориво. На тој начин би се намалила цената на произведен тон бакар за 500 долари, што би бил аргумент за нашите сопственици, кои во тој случај не би го затвориле рудникот целосно“, рече Николов, на вчерашната седница на Асоцијацијата за рударство во Стопанската комора.
Тие, и покрај алармантната состојба во секторот, како да немаа многу што да кажат, а некои прокоментираа дека досега е веќе се' кажано во врска со позицијата во која западнаа поради економската криза.
Mенаџерот од рудникот за олово и цинк, „Саса“, Максим Прохоров, вели дека засега ќе нема отпуштања. Но, ако продолжи намалувањето на цената на оловото и на цинкот, тоа сигурно ќе се одрази врз натамошното работење.
Отпуштање работници засега нема да има и во рудниците за олово и цинк „Тораница“ и „Злетово“. Според претставниците на „Индоминерали метал“, во чија сопственост се овие рудници, максимално се редуцирани трошоците во работењето и се успева некако да се продолжи со работа. (М.Т.) |
