Коментар
Македонска фудбалска клупска беда
Сашко Ѓ. Димовски
Работнички му даде вештачко дишење на мак-фудбалот и за момент го исклучи од апарати по катастрофата на Милано, „шампионската“ екскурзија на Македонија Ѓорче Петров и експресната елиминација на Ренова. Иако загуби, прволигашот од Џепчиште, сепак, достојно се прости со Европа што не беше случај со „миланезите“ и ѓорчепетровци.
И како што е ред по секој спортски неуспех да се даваат коментари така беше и овојпат, но ништо поразлично од претходните. Па, повторно бевме „почестени“ со веќе изнаслушаните причини за пораз што веројатно минуваат само кај нас, кои се веќе излитени, демоде. Се пуштаат во етер како музичко или филмско ДВД. Разлика нема. Сите се како јајце на јаце. Како причини за слабите партии, лошите резултати и неможноста да се мине една фудбалска пречка во Европа се наведуваат буџетот на противникот, потоа фактот дека првенството кај нас не е почнато кога УЕФА ги организира квалификациските рунди за европските купови, топлото време, искуството, традицијата, инфраструктурата. Но, во четвртокот следеше демант за сите наши фудбалски работници кои на разноразни начини се обидуваат да го исперат срамот и да најдат алиби за сопствената работа.
Првиот демант стигна од Никшиќ каде на стадионот „Крај Бистрица“ падна големиот и богат состав на Анортозис од Кипар, земја во која фудбалот и вложувањата се во страшен подем. Елиминацијата што спаѓа во рангот на првокласна сензација ја направи малиот и сиромашен црногорски прволигаш од Будва, тимот на Петровац, во неговото деби во Европа. Нашиот најтрофеен клуб Вардар беше рутина за истиот тој Анортозис пред две години. Но, Кипраните овојпат наидоа на лав крај Јадранот. Среќно или не, сепак, Петровац мина во третото коло. Втор демант за нашите екипи е Севојно, до лани член на втората ��ига на Србија. Финалистот во српскиот куп го елиминира литвански Каунас благодарение на ремито со голови на гости (во Белград беше 0:0, во Каунас 1:1).
Третиот дојде од Азербејџан. Исто така малиот Карабак го доби двомечот со големиот Розенборг и се пласира во третата рунда за Лига Европа.
Слави и Сараево. И тамошната јавност имаш причина за задоволство. Широки Брег испадна, но не и Сараево и Славија. Сараево ја елиминира Трнава на гости, Славија, пак, го отстрани дански Алборг од вториот по ранг европски фудбалски куп на стариот континент.
Па, сега треба да анализираме дали црногорската лига е подобра од кипарска, српската од литванската, азербејџанската или босанско-херцеговската од данската. Или пак, треба да правиме споредба меѓу буџетите на Славија и Алборг, меѓу оној на Петровац и Анортозис, меѓу оној на Карабак и Розенборг.
Споредби не се потребни. Тие служат само за задоволување на егото на поединците и моментно прикривање на слабостите, фудбалските фрустрации остануваат. Затоа апелираме до Европската фудбалска федерација да им дозволи на нашите екипи да се приклучат во европските купови во септември за да се избегнат летните горештини бидејќи по свежо време го имаме фудбалот во малиот прст, можни противници на македонските екипи да бидат само клубови со годишен буџет од 100.000 евра, по можност во противничките екипи да има најмногу двајца странци, а клубот да има само едно помошно игралиште. За да бидеме рамноправни оти вака не е фер. Па, нели фер-плејот во сите сегменти е една од кампањите на УЕФА. |
