Пожар трет ден ја коси боровата шума на Кајмакчалан
Поради близината на границата, Грција понудила соработка за гаснење на пожарот
БИТОЛА - Атарот на мариовското село Градешница трет ден е под опсада на огнот. На планината Кајмакчалан, само пет километри од македонско-грчката граница, кај местата Северна Стена, Зајкова Тумба и Бегова Падина на површина од шеесетина хектари гори трева, високостеблеста и нискостеблеста борова шума. Огнот се шири во правец на караулата „Сокол“. Пожарот е приземен и засега се' уште гори долниот дел. Поради близината на границата, Службата за заштита од пожари на Грција веќе понудила соработка за гаснење на пожарот.
Засега, на терен се околу 25 вработени во битолската подружница на ЈП Македонски шуми - Шумско стопанство Кајмакчалан.
„Се обидовме во понеделникот да отидеме со возила, но таму теренот е непристапен, може да пристапи само човек“, вели Златко Совревски, командир на битолската противпожарна единица.
Од дирекцијата на Центарот за управување со кризи предупредуваат дека дополнителен проблем предизвикуваат неексплодираните убиствени средства од Првата светска војна.
„Поради огнот и високата температура забележани се неколку експлозии“, изјави Тихомир Каранфиловски од Центарот за управување со кризи.
Поради специфичноста на теренот, надлежните апелираат на вклучување доброволци во гаснењето на пожарот. (А.Б.) |
