Чилеанските рудари ќе видат бел ден наскоро

КОПИАГО - Постојат нови надежи дека 33 рудари заглавени под земја во Чиле би можеле да бидат спасени за неколку дена наместо за неколку недели. Точно два месеца откако рударите во Сан Хозе беа затрупани, огромната дупчалка се верува дека за еден или за повеќе дена ќе пробие отвор преку кој тие ќе се извлекуваат. Откако дупчалката ќе стигне до засолништето на рударите, отворот, најверојатно, ќе треба да биде обрабен со метална цевка што ќе биде вметната пред рударите да бидат спасени со капсулата и извлечени на површината еден по еден. Рударите се затрупани на околу 700 метри длабочина откако на 5 август се случи несреќата во рудникот. Тие беа пронајдени здрави и живи по 17 дена потрага, преживувајќи со скудни оброци. Нивната борба за преживување привлече пораки со поддршка од целиот свет, вклучувајќи ги молитвите од папата Бенедикт. (Скај њус)