Холандски популист на суд

Герт Вилдерс се товари и за поттикнување омраза против муслиманите

Герт Вилдерс би можел да прерасне во нова силна фигура на политичката сцена на Холандија. Но, претходно тој ќе мора да одговара пред суд.

Слики од 11 септември, од терористичките напади во Мадрид и во Лондон и од убиството на холандскиот режисер Тео ван Гог. Сето тоа проследено со цитати од Коранот, во кои поради несоодветниот превод, се повикува на насилство против немуслиманите.

Згора на тоа, снимки од проповедници кои шират омраза, а во основа тажна музика од Едвард Григ. „Фитна“, дваесетминутниот филм на Герт Вилдерс завршува со апел, испишан со бели букви на црна основа.

„Во 1945 година, во Европа беше победен националсоцијализмот. Во 1989 година Европа го победи комунизмот. Сега мора да се победи исламската идеологија“.

Филмот „Фитна“ го донесе Вилдерс на обвинителната клупа. Но, тоа не беше се'. Меѓу другото, и изјавите како:

„Нашата култура, која се заснова на христијанството, еврејството и на хуманизмот, е подобра отколку заостанатата исламска култура“, смета Герт Вилдерс.

Уште една изјава за која се товари Вилдерс е изнесена во интервју за весник. При отворањето на процесот против него, во почетокот од годинава, таа беше прочитана од државниот обвинител:

„Коранот, тоа е ’Мајн кампф’, религија што е насочена кон тоа да ги елиминира останатите, немуслиманите, односно ’неверните кучиња’“.

Поради тоа, во обвинителниот акт против него стои ширење омраза против исламските верници. Освен тоа, Вилдерс се товари и за навреда на група граѓани, како и за поттикнување расна омраза против Мароканците и останатите народи, кои не потекнуваат од Запад. Меѓутоа, обвинетиот не се смета за виновен по ниту една точка. Нему му е најважно следното прашање:

„Дали моите изјави и споредби се точни? Ако нешто е точно, како може да е казниво?!“

На шефот на Партијата за слобода му се заканува затворска казна од една година доколку биде осуден. Меѓутоа, сосема е извесно дека Вилдерс ќе го искористи процесот против него за да се претстави себеси како жесток поборник за слобода на мислењето:

„Разочаран сум од тоа што морам да одговарам пред суд во исполитизиран процес за работи што ги реков околу исламот, а што ги мислат и милиони други во Холандија. Сето тоа оди на штета на слободата на мислењето. Тоа сега ќе биде жртвувано на олтарот на исламот, што е многу тажно“, смета Вилдерс.

Процесот почна во понеделникот, а предвидено е судот да заседава осум пати. Конечната пресуда треба да биде донесена на 4 ноември. Дотогаш власта треба да ја преземе и новоизбраната холандска влада, која е упатена на поддршка од Герт Вилдерс. (Дојче веле)