Студирале празнење туѓи сметки

Студенти од поранешните советски републики преку Интернет ограбувале граѓани и цркви во САД

МОСКВА - Американската полиција уапси уште шестмина студенти од Русија, кои со помош на Интернет чистеле туѓи банкарски сметки. Рускиот конзул во Њујорк потврди дека досега се уапсени 11 руски студенти, кои биле во голема група хакери од подрачјето на поранешните советски републики. Американската полиција на потерница ставила фотографии од 37 лица, од кои дури 26 се од Русија. Осомничените се млади луѓе на возраст од 20 до 25 години, и сите влегле во САД како студенти или лица што дошле на разни специјализации. На обвинетите им се заканува затворска казна од 10 до 30 години.

Засега не се знае кој ги ангажирал студентите да се занимаваат со оваа валкана работа. Тие го користеле вирусот „зевс тројан“ и со негова помош влегувале во туѓи компјутери. Благодарение на тој вирус, доаѓале до податоците што им биле потребни за да можат да симнуваат пари од нивните банкарски сметки. Инаку, со тој вирус биле заразени компјутерите на пет американски банки. „Зевс тројан“ бил модофициран во однос на оној што се појави во почетокот на 2007 година. Хакерите испраќаа писма и кога корисниците на компјутери го отвораа вирусот, тој почнувал да „копа“ по поштата, па крадците доаѓаа до потребните податоци за банкарските операции.

Задачата на уапсените била да ги префрлат парите од САД во странство. Жртви на хакерите биле мали компании, приватни лица, па дури и цркви. Секоја група имала свој лидер. Кај руските студенти тоа биле Артјом Семјонов и Артјом Циганков. Интересно е тоа што меѓу осомничените има и многу девојки. Колку се засилиле хакерите е доказ и тоа што еден од нив на рускиот сајт „од истиот клас“ на своите сонародници им испратил слика од Америка каде што се сликал пред компјутерот на кој во круг наредил долари.

Руските и други хакери се товарат дека од туѓи сметки симнале три милиони долари, меѓутоа се сомнева дека таа сума е неколку пати поголема. Освен Руси, во таа хакерска акција учествувале граѓани од Украина, Белорусија, Холандија, Велика Британија и од САД. (Б.В.)