Санадер повторно меѓу Хрватите

Хрватска се возбуди откако бившиот премиер повторно седна во пратеничките клупи на Соборот

Горан Адамовски

Што му требаше на Иво Санадер да се врати во политиката кога пред петнаесет месеци даде оставка од премиерската функција во Хрватска, а згора на тоа, десетина месеци беше надвор од земјата? Со ова прашање хрватската јавност се занимава веќе неколку денови откако Санадер доби дозвола да го активира пратеничкиот мандат и да се врати во клупите во Соборот.

Шпекулациите се вртат на две точки: пратеничкиот мандат му дава имунитет што барем засега го чува од ��ласиштата дека се богател преку криминални активности или, пак, дека целта му е да ги повика околу себе пратениците од владеачката ХДЗ, кои му останаа блиски и со барем шест од нив да и' го одземе мнозинството во Саборот на премиерката Јадранка Косор и со тоа да ја турне од власт.

Односите меѓу нив двајца се влошија набргу по именувањето на Косор за наследник на Санадер по неговото шокантно повлекување од политиката, без притоа да образложи зошто. Потоа се обиде да се оправда со притисоците што и' ги наметнала Словенија на Хрватска за одблокирање на преговорите за влез во ЕУ, но јавноста воопшто не наседна на тоа.

Косор експресно успеа да го реши спорот со Словенија, доведувајќи ја земјата пред портите на ЕУ, воедно давајќи зелено светло да се расчистат сите коруптивни афери што ја тресеа земјата. Во многу од нив беше споменувано името на Санадер, кој во меѓувреме беше избркан од ХДЗ. Беа апсени негови блиски соработници, а неговиот поранешен заменик, Дамир Поланчец, веќе доби две првостепени пресуди од 15, односно 12 месеци поради криминал. Санадер беше повикан и како сведок во скандалозната приватизација на нафтената компанија ИНА и стануваше се' поочигледно дека клопчето околу него се замотува.

Следуваше уште еден негов драматичен потег кога сосема ненадејно се врати во земјата. При сведочењето рече дека во приватизацијата на ИНА немало ништо спорно и дека сите одлуки ги донел во соработка со своите блиски луѓе, на чело со Косор. Актуелната премиерка изјави дека Санадер не ја зборува вистината.

Во меѓувреме, името на Санадер се врзува во контекст на уште десет афери, кои се' уште се во фаза на истрага. Пратеничкиот имунитет засега ќе го чува, но може да му биде одземен во случаи на тешки криминални дела. Дали ќе се обистинат гласиштата дека ако собере шест пратеници за да падне Косор тешко е да се предвиди, бидејќи, како што пишуваат медиумите во Загреб, „ретко некој паметен би се здружил со некој кому јажето му е на вратот“.