Националниот тим ја заокружи првата недела од подготовките

Сашко Ѓ. Димовски

Македонската машка одбојкарска репрезентација финишира со првата недела од подготовките кај „Истатов“ за мајските дуели против Холандија, Португалија и Шведска во квалификациите за пласман на Европското првенство во 2011 година. Селекторот Светислав Пеица во изминатите пет дена работеше со осуммина одбојкари (браќата Никола и Ѓорѓи Ѓоргиеви, Влатко Трајчевски, Александар Љафтов, Иван Андонов, Виктор Зафиров, Благој Гинов и Дејан Симовски), а за вчера попладне беше најавено приклучување и на Александар Милков во националниот тим. По викенд-обврските кон своите клубови, останатите одбојкари ќе допатуваат во текот на наредната недела, а селекцијата се очекува да се комплетира в четврток.

„Изминатата недела работевме на физичката подготовка и техниката. Здравствениот билтен засега е поволен. Никој од присутните овде не се жали на повреда. Од Франција добив информација дека Јовица Симовски се повреди на последниот меч за Арагон де Сет, но не можам да кажам за каков вид на повреда станува збор. Се надевам дека не е сериозна и дека Симовски ќе биде во состојба да и' помогне на репрезентација во квалификациите за Европското првенство. Имаме одлични услови за работи кај Истатов, верувам дека максимално ќе ги искористиме, дека добро ќе се подготвиме за дуелите што не' очекуваат во мај“, ни изјави селекторот Светислав Пеица кој во неделата што е пред нас ќе ги очекува браќата Милеви, Атанас и Владо, Александар Митев, Филип Деспотовски, Владимир Стевовски, Вук Карановиќ, Жарко Ристоски, Ѓоко Јосифов, Јовица Симовски и Зоран Ѓорѓевски.

Во рамки на едномесечните подготовките нашата репрезентација ќе одигра и шест пријателски мечеви. На 4 и 5 мај ќе и' гостуваме на селекцијата на БиХ во Модрича и Оџак, против Србија ќе играме на 7 мај во Белград и ден подоцна во Смедерево, последната проверка на можностите ќе ја имаме во Скопје на 15 и 16 мај против репрезентацијата на Бугарија.

Македонија е домаќин на првиот квалификациски турнир во групата Ф за ЕП 2011. Мечевите против Холандија, Португалија и Шведска ќе се одиграат во салата „Борис Трајковски“ во Скопје, вториот турнир ќе се одржи во Ротердам, Холандија, од 28 до 30 мај.