Хауг бара поддршка за малите Ф1-тимови

Шефот на „Мерцедес“ со повик да им се помогне на приватните екипи да станат конкурентни

Шефот на „Мерцедес“ за мотоспорт, Норберт Хауг, смета дека Формула 1 треба да стори повеќе за да им помогне на приватните тимови да достигнат компетитивно ниво во овој спорт. Во моментов Ф1-тимовите веќе бараат промени на правилата за моторите, кои ќе стапат во сила во 2013 година. Но, што и да биде решено, Хауг верува дека треба повеќе да им се помогне на независните производители.

„Мислам дека сега ги имаме најдобрите тимови и добро е да се имаат различни болиди на патеката, но ние треба да им помогнеме на независните произведувачи за да овозможиме план ’оддолу нагоре‘ место ’одгоре надолу‘. Нам ни требаат независните производители, а треба да го имаме и Ферари. Треба да најдеме добра солуција во однос на техничките прашања. Јас сум голем оптимист за овој процес и ние можеме да го оствариме тоа заедно“, уверен е Хауг.

Еден од чекорите што ги разгледува Формула 1 се моторите пријателски спрема околината со оглед на тоа дека спортот се обидува да стане колку што е можно позелен.

„Фасцинантното нешто во врска со Формула 1 е нејзината брзина, нејзината гласност и нејзиното одење до границите“, додава тој. „Ние можеме да дискутираме за зелените иницијативи, но на Формула 1 и' треба техничко водење. Ако летате од Европа до Јапонија со ’боинг 747‘ ќе потрошите повеќе гориво отколку во целата Ф1-сезона. Потребно е да ја видиме целата слика. Треба да имаме на ум дека ние правиме најчисти болиди што можеме. Моторот ќе биде смален во 2013 година поради потребата од намалување на потрошувачката на гориво, а треба да ја намалиме и емисијата на јаглероден диоксид“.