ПЕКИНГ - Во пожар во ноќен клуб во јужниот кинески град Шенжен загинаа најмалку 43 лица, а 88 се повредени. Пожарот избувна во саботата во 23 часот во клубот „Денс кинг“ во квартот Лонг Ганг во Шенжен, во близина на границата со Хонгконг. Во тоа време во клубот имало речиси 1.000 луѓе. Пожарот сега е локализиран, а противпожарните служби се сомневаат дека бил предизвикан од огномет на сцената на ноќниот клуб. Шефот на провинцијата Гуангдонг, Ванг Јанг, нареди да се спроведе истрага за причините на пожарот.
Според некои новинари во Шенжен, клубот се наоѓал во трикатна зграда и пожарникарите морале да кршат прозорци при спасувањето, додека други биле блокирани од цигли или дрвени штици. „Имаше само тесен премин во холот. Многу луѓе беа повредени во стампедо“, рече Јанг Жи, вработен во клубот, јавува новинската агенција Ксинхуа. Тој побегнал откако се натопил со вода, но сепак има изгореници на вратот, јави агенцијата.
Големи пожари се честа појава во Кина, каде што безбедносните регулативи често пати не се почитуваат, јавуваат дописниците. (Би-Би-Си)
