БХУБАНЕСВАР - Спасувачките екипи евакуираа околу 200.000 луѓе по поплавите на една од најголемите реки во Индија, од кои 16 лица загинаа во текот на викендот, додека надојдените реки поплавија делови од Непал и однесоа 17 животи, јавија вчера официјални претставници. Големи делови од крајбрежната држава Ориса во Индија се поплавени, а властите беа принудени да отворат десетици одводи на брана на реката Маханади по поројните дождови во таа област. Монсунските дождови и поплавените реки предизвикаа огромни штети во јужна Азија оваа година, при што загинаа над 1.200 луѓе, главно во Индија и Непал.
„Најмалку 200.000 луѓе се евакуирани од нивните домови и преместени на побезбедни места“, рече Г.В. Венугопала Сарма, претставник за приходи во Ориса. Тој рече дека уште повеќе луѓе се евакуираат. Телевизиските станици прикажаа снимки како луѓето бегаат од поплавите со се' што можат да понесат. Некои се засолнуваат на патиштата и во училишните згради. (Ројтерс)
