Тенисерите почнаа со пораз

Русевски загуби во три сета од Атила Балаж во првиот ден од мечот од Дејвис купот во Унгарија

Тениската репрезентација на Македонија почна лошо во првиот натпреварувачки ден од средбата со Унгарија за опстанок во Втората група од Евроафриканската зона на Дејвис купот. Предраг Русевски, кој неделава е 1533. на АТП-листата во поединечна конкуренција, го отвори натпреварот на земјените терени на тенискиот комплекс во Годоло Кишкаштељ со пораз од 6-4, 6-2, 6-4 по нешто повеќе од два часа игра со Атила Балаж (224.). За првиот македонски рекет тоа беше 18. неуспех во 38. меч во сингл за националниот тим.

По него Грабулоски (1340.) му излезе на мегдан на вториот унгарски рекет Адам Келнер (443.) и до затворањето на весникот губеше со 2:1 во сетови. Единствениот левучар во репрезентацијата првите два сета ги загуби со 6-1 и 6-4, за потоа да го добие третиот со 7-5.

Русевски и Лазар Магдинчев попладнево од 14 ч. во двојки ќе се обидат да ја продолжат надежта до двата сингла в недела. Противници на популарниот Пецко, кој е 1165. на АТП-листата за играчи во дубл, и на Лазе (1371.) ќе им бидат Ѓерѓ Балаж (849.) и Корнел Бардоцки (914.). Унгарската двојка никогаш нема играно заедно во Дејвис купот, а резултатот на Русевски и на Магдинчев во ова натпреварување е 12:5 во победи.

Зависно од епилогот на дубл-пресметката, в недела би можел да добие шанса и најмладиот во македонскиот тим, 19-годишниот Томислав Јотовски. Според ждрепката, пак, во првиот сингл Грабулоски од 11 ч. треба да му се спротивстави на Атила Балаж, а по нив се пријавени Русевски и Келнер.

До мечот за опстанок Македонија стигна со поразот од 3:2 од Босна и Херцеговина во салата „Гемиџии“ во Велес во март годинава, кога Унгарците неочекувано беа декласирани со 4:1 од Естонија во Талин. (Р.Д.)