Циклус на чешки филм во Кинотека

Меѓу петте современи чешки филма се документарецот „Граѓанинот Хавел“, сниман цели 13 години, и наградуваната воена драма „Тобрук“

Од денеска до 22 декември во Кинотеката на Македонија ќе се одржи циклусот на современ чешки филм, кој носи многу интересни пет остварувања од последниве две години.

Циклусот во 20 часот ќе го отвори документарниот филм „Граѓанинот Хавел“ на авторската двојка Мирослав Јанек и Павел Кутецки, кој годинава беше прикажан на Фестивалот на филмската камера „Браќа Манаки“ во рамките на Документарната програма и привлече големо внимание. Станува збор за филм кој е сниман цели 13 години, во кој ја следи кариерата на Вацлав Хавел, но и некои приватни моменти и неофицијални комуникации, што фрла едно поинакво светло на настаните од тоа време, но и на личноста на Хавел.

Во недела и во понеделник следуваат остварувања на две режисерки, кои се фокусираат на проблемите и дилемите на младите генерации. Првиот е „Кој се плаши од волкот лош?“ на Марија Прохаскова, кој се осврнува на светот на едно мало девојче, кое се обидува меѓу фантазијата и реалноста, да го пронајде своето место. А вториот, „Ноќни птици“ на Михаела Павлатова на необичен начин се занимава со тоа, каде е смислата на животот низ очите на младата 19-годишна девојка.

Претпоследниот ден ќе се прикаже првиот дел од комедијата „Грозје“ на Томаш Барина, како што велат, една летна комедија за двајца пријатели што живеат како измамници. Циклусот завршува со воената драма „Тобрук“ на Вацлав Мархул, кој освои три „чешки лава“. „Тобрук“ е филм за познатата битка од 1941 година, кога овој севернолибиски град беше опседнат од германски и од италијански војски.

Сите проекции ќе се одржат од 20 часот. (С.У.)