Напнато во Тетово - ВМРО-ДПМНЕ го бојкотира Советот

Советниците од ВМРО-ДПМНЕ ја напуштија седницата на Советот во Тетово по одбивањето да се расправа за графитот за голема Албанија

ТЕтово - Советничката група на ВМРО-ДПМНЕ во Советот на општина Тетово вчера ја напушти седницата откако со 17 гласа „против“ и 8 „за“ беше отфрлен нивниот предлог Со��етот да расправа по инцидентот со цртањето графит со картата на Голема Албанија на излезот од Тетово и да ги осуди сите обиди за загрозување на соживотот во Тетово и државата.

„Не наидовме на разбирање за нашата загриженост поради што сметаме дека со тоа е доведена во прашање и нашата работа во Советот. Со овој гест ние како советници испраќаме порака до сите дека концепциите за Голема Албанија, Голема Македонија, Голема Србија и Голема Бугарија не' носат во погрешен правец, а единствена концепција во која веруваме е Голема Европа. Во името на добрите меѓуетнички односи и повеќевековниот соживот на сите кои живеат на овие македонски простори се решивме на овој чекор за кој се надеваме на поддршка од сите наши добронамерни сограѓани“, изјави кординаторот на советничката група, Мирослав Кочовски.

За предлогот на Кочовски, кој го даде за време на утврдувањето на дневниот ред на седницата, гласаа сите советници Македонци присутни на седницата. Од советничката група на СДСМ рекоа дека предлогот го поддржуват, но во однос на напуштањето на седницата сметаат оти треба да се дејствува внатре во Советот и преку дискусија да се решаваат сите прашања.

„Ја поддржуваме иницијативата на ВМРО-ДПМНЕ да се расправа за последниот инцидент со картата за големодржавна творба бидејќи советот како политички орган во општината мора да расправа за вакви состојби. Мислам дека треба да се продолжи со присуство на седницата и сите проблеми да се надминуваат преку разговор и дискусии по легален пат“, рече координаторот на советничката група на СДСМ Александар Симјаноски.

Претседталот на Советот Ирфан Емини кој доаѓа од редовите на советничката група на ДУИ истакна Советот не бил подготвен да расправа ниту бил информиран претходно за ваква точка на дневниот ред.

„Вообичаено е доколку некоја советничка група има намера да додаде точка на дневниот ред тоа да го направи претходно на заедничка координација на сите советнички групи. Затоа предлогот на ВМРО-ДПМНЕ е отфрлен од мнозинството советници. Јас го поддржувам секој предлог што доаѓа од советниците, но со претходен договор“, изјави Емини.

Советничка група на ДПА не го прифати овој предлог на ВМРО- ДПМНЕ бидејќи сметаат дека околу овие проблеми мора пошироко да се дебатира.

„Треба претходно да се подготват сите за дебата за евентуалните одлуки да функционираат подобро и поубедливо“, рече координаторот на советничката група на ДПА Дурим Љума. (П.Р.)