И уште нешто

Радиодифузна такса

Најновите измени на Законот за радиодифузна дејност со кои меѓу другото се предлага зголемување на радиодифузната такса од 130 на 190 денари и изедначување на времето за рекламирање со другите радиодифузери вчера се разгледани на собраниската Комисија за транспорт и врски.Со измените, јавниот радиодифузен сервис ќе емитува и игри на среќа.

Лизгалиште во Струмица

На плоштадот „Гоце Делчев“ во Струмица почна монтирањето на привременото градско лизгалиште со површина од 600 квадратни метри. За користењето на лизгалиштето, како и на опремата, меѓу која се и 300 пара лизгалки и помошни реквизити, ќе бидат платени два милиони денари од буџетот на општина Струмица.

Годишнина на Пелистер

Национален парк „Пелистер“ во Битола ја одбележа 63 годишнината од прогласувањето на планината Баба со врвот Пелистер за Национален парк.

Националниот парк „Пелистер“ е на површина од 12.500 хектари и е прво заштитено природно богатство во Република Македонија и се карактеризира со повеќе врвови и возвишенија над 2.000 метри.

Аргентина во Македонија

Аргентина е вратата за влез во јужноамериканската економска заедница МЕРКОСУР со пазар од 298 милиони потрошувачи, БДП од 3,3 билиони американски долари и 11.018 долари по глава на жител. Ова вчера на македонските стопанственици им го порача Гилермо Салвадор Азрак, аргентинскиот амбасадор со седиште во Софија.

Совети преку телефон

На бесплатниот телефонски број 0800 11 444 или СОС-линијата за помош од дрога, ХИВ/СИДА и со други инфекции преносливи по сексуален пат, од јануари до октомври годинава помош побарале над 226 граѓани и биле поставени над 412 прашања. Од Град Скопје информираат дека линијата функционира од 2003 година секој ден, од 9 до 19 часот.