Мугабе се подготвува за „војна против народот“
Хараре - Владејачката партија во Зимбабве на претседателот Роберт Мугабе, Африкански национален сојуз на Зимбабве - Патриотски фронт (ЗАНУ-ПФ), побара од Централната изборна комисија повторно да ги преброи гласовите добиени во првиот круг од гласањето на претседателските избори на 29 март, пренесоа светските агенции, повикувајќи се на информација на домашниот весник „Санди мејл“.
Партијата на Мугабе добила сигнали за направени грешки при пребројувањето на гласачките ливчиња и затоа инсистира на повторно пребројување.
Опозицијата, меѓутоа, смета дека оддолжувањето на соопштувањето на резултатите од гласањето се должи на обидот на владејачката партија и на претседателот да ги фалсификуваат изборните резултати во своја корист.
Партијата на Мугабе, исто така, го одби предлогот на опозициското Движење за демократски промени за формирање влада на национално единство, посочуваат агенциите, повикувајќи се на весникот. |
