Рикер: Србија не смее да организира избори на Косово
Приштина - Овластување за организирање избори на Косово има само УНМИК, а изборите кои во Косово ќе ги организираат српските власти нема да бидат валидни, изјави шефот на Мисијата на ОН, Јоаким Рикер.
„Само УНМИК има овластување да организира избори на Косово“, рече Рикер и изрази надеж дека „Белград, бидејќи вели дека ја почитува Резолуцијата 1244, нема да организира локални избори на Косово“.
Во интервју за приштинскиот весник „Коха диторе“, тој потсети дека според Резолуцијата 1244 на Советот за безбедност на ОН, „УНМИК администрира со Косово и оти Белград треба да го почитува тоа“ и нагласи дека тоа треба да важи и кога станува збор за одржување локални или парламентарни избори на Србија на Косово.
„Одлучно ќе бараме од Белград да појасни дали планира да организира локални избори на Косово без одобрение од УНМИК и тогаш ќе видиме како ќе се развива тоа прашање, истакна Рикер
Прашан како ќе реагира УНМИК доколку Србија без одобрение, сепак, организира избори на Косово, Рикер рече дека тоа „ќе доведе до заклучок дека тие избори на Косово немаат валидност“. Тој најави дека администрацијата на УНМИК „за неколку дена ќе го има одговорот од Србија за ова прашање“. (МИА) |
