Поетска совест на нашата земја

Претседателот на МАНУ академик Георги Старделов на вчерашната комеморативна седница во МАНУ, истакна дека смртта на Гане Тодоровски претставува најголема загуба бидејќи тој беше поетската совест на нашата земја и на нашиот народ. „Одамна е кажано: со смртта на еден голем човек и голем поет не умира само тој, туку умира и нешто во нас и дела од нас што остава по него голема празнина и голема болка кои долго не се забораваат. Зошто од сега па до века Гане ќе живее во нас со своите песни кои веќе приживе овој народ ги кажува како негови трајни македонски аманети. Гане Тодоровски беше единствен во македонската поетска фаланга и затоа никогаш овој народ не ќе го заборави, зашто така ти било тоа од искони: ние луѓето не ги забораваме само оние кои не можеме да ги замениме и на кои не можеме да им пронајдеме рамни. Такви по Гане не ќе најдеме“.