Кошаркарите од денеска на тренинг во Охрид
Сите 16 играчи од списокот за ЕП во Литванија ги поминаа медицинските тестови
Машката кошаркарска репрезентација на Македонија од денеска до петок во спортската сала „Билјанини Извори“ во Охрид ќе ја одработи втората фаза од подготовките за Европското првенство во Литванија, кое ќе се одржи од 31 август до 18 септември. По еднонеделните тренинзи во „Борис Трајковски“, 16 играчи од потесниот список на селекторот Марин Докузовски ги поминаа и медицинските тестови, па во Охрид ќе можат да бидат подложени на поинтензивни напори.
В сабота се патува за Словенија, каде што во Птуј ќе бидат одиграни контролни натпревари со домашната селекција и со Полска. Оттаму се продолжува за Италија на турнирот во Бормио на 29 и 30 јули, на кој, покрај домаќинот, ќе учествуваат и Бугарија и Канада. Од 1 до 4 август повторно ќе се тренира во Скопје, за наредниот ден одново да се замине за Словенија на турнирот на ексјугословенските републики во Љубљана. По него следуваат завршните подготовки во Скопје, кои од 19 ��о 21 август ќе бидат разбиени со „Трофеј на Македонија“, на кој противници ќе ни бидат Бугарија, Црна Гора и Нов Зеланд по тој редослед.
За Литванија се заминува на 29 август, а два дена подоцна Македонија ќе стартува на ЕП против Црна Гора. Во рамките на групата Ц од прелиминарната фаза во Алитус најдобрите македонски кошаркари ќе ги одмерат силите и со Хрватска, потоа со победникот од августовскиот дополнителен квалификациски турнир на кој ќе играат Финска, Унгарија и Португалија, како и со Грција и со Босна и Херцеговина. (Р.Д.) |
