Рондо го разигра Бостон како некогаш Кузи

Со победата од 104:86 во Кливленд, селтикси израмнија на 1:1 во полуфиналето на Истокот

Кошаркарите на Бостон дојдоа до предност на домашен терен откако славеа во вториот меч против домашниот Кливленд со 104:86 и израмнија на 1:1 во полуфиналето на Истокот.

Најефикасен во гостинскиот тим беше Реј Ален со 22 поена, додека Рејжон Рондо имаше 19 асистенции, со што го израмни клупскиот рекорд во доигрувањето, кој до сега беше во рацете на легендарниот Боб Кузи.

Бостон во првиот натпревар испушти 11 поени предност, а во овој имаше и 25 при резултат 91:66, девет минути пред крајот. Меѓутоа, Кливленд направи серија од 15:0 и дојде до 93:83 на три минути пред последниот свиреж на сирената, но сили за пресврт, сепак, немаше. Најефикасни кај Кливленд беа Леброн Џејмс и Ентоан Џејмисон со по 16 коша.

По три дена одмор поради повреда на колкот, во тимот на Феникс се врати Стив Неш и натпреварот со Сан Антонио го одигра одлично, постигна 33 коша и имаше 10 асистенции. Одлична помош имаше од Ричардсон со 27 и Стодемајер со 23 коша. Џинобили со 27 и Данкан со 20 поени и 11 скока беа најдобри поединци во редовите на Сан Антонио.

Резултати: Кливленд - Бостон 86:104 (резултат во серијата 1:1) и Феникс - Сан Антонио 111:102 (1:0).