Сто кинески милионери ќе ги донираат своите пари

Кинески мултимилионер убеди повеќе од сто бизнисмени да го донираат севкупното лично богатство во добротворни цели, објавија денеска кинеските медиуми.

Во текот на септември во Кина ќе биде организирана вечера од страна на милијардерите-филантропи Бил Гејтс и Ворен Бафет, со цел да ја промовираат својата организација „Да дадеш завет“. Голем дел од богатите Кинези досега одбиваа д�� се вклучат во неа.

Чан Гуанбао, чие богатство се проценува на околу 440 милиони долари и е еден од најголемите кинески донатори, соопшти дека ќе го даде целото свое богатство за добротворни цели. Тој додаде дека успеал да убеди повеќе од 100 кинески бизнисмени да одговорат на повикот да му го донираат на општеството своето лично богатство.

Основачот на „Мајкрософт“, Бил Гејтс, и инвеститорот Ворен Бафет во писмото што го испратија изминатата седмица нагласија дека нема да вршат притисок врз супербогатите семејства да и' се приклучат на организацијата, бидејќи Кина мора да изгради сопствена култура на филантропија.

Западните донатори се загрижени за евентуална корупција или залудно трошење на средствата при користење на парите за добротворни цели, но во Кина донаторите имаат и други притисоци. Голем дел од нив стравуваат дека доколку донираат голема сума во добротворни цели ќе привлечат непотребно внимание кон сопствениот бизнис, како од властите, така и од конкуренцијата. (МИА)