Каматата на резервите иста, нафтата скока

ЊуЈорк - Цената на нафтата на Берзата во Њујорк вчера се искачи на 82 долара за барел откако Управата за федерални резерви соопшти дека клучната каматна стапка ќе остане ниска во следните две години.

Цената на нафтата на Њујоршката берза се зголеми за 2,64 долари, односно на 81,94 долари за барел по завчерашниот пад за два долара, додека во исто време европската „брент“ нафта на Лондонската берза поскапи за 1,81 долар и сега изнесува 104,38 долари за барел.

Соопштението на ФЕД придонесе за смирување на загриженоста на инвеститорите дека американската економија може повторно да влезе во рецесија. Таа информација предизвика зголемување за четири отсто на еден од клучните индекси на Њујоршката берза, Дау Џонс индастријал, со што е неутрализиран неговиот претходен пад, а денеска се зголемија и вредностите на индексите на азиските берзи. (МИА)