Милијарди евра од неплаќање данок на алкохолот

Букурешт - Само во последните осум години Романија загуби 4,5 милијарди евра поради затајување данок на алкохолот, соопшти романското Здружение на производители на алкохолни пијалаци (ГАРАНТ).

Според директорот на ГАРАНТ, Раду Мараију, некои компании ги декларираат алкохолните пијалаци како козметички производи или не го пријавуваат нивниот точен состав и на тој начин затајуваат данок.

„Таквите несовесни производители, освен што му нанесуваат штети на државниот буџет, ги загрозуваат и легитимните производители на алкохолни пијалаци и претставуваат закана за здравјето на потрошувачите“, потенцира Мараију.

Регулирање на секторот на алкохолни пијалаци побара и романското земјоделско здружение „Агростар“, кое се закани со улични протести во текот на септември доколку дотогаш владата во Букурешт не преземе мерки за средување на состојбите со производството на алкохол. (МИА)