За фасадите рок од две години

Граѓаните мора да постават фасади на домовите во рок од две години од стапувањето во сила на Законот за градење, договорија вчера преку заеднички амандман членовите на Комисијата за транспорт и врски, која по тридневна расправа го заврши разгледувањето на поднесените 80-тина амандмани на Предлог-законот за градење. Доколку не постават фасади во предвидениот рок, граѓаните ќе платат глоба од 100 до 500 евра. Членовите на Комисијата од опозицијата обвинија дека таквата законска одредба има цел да се полни Буџетот и оценија дека е неприменлива со оглед на економската криза.

Амандмански Комисијата интервенираше и во член 138, од кој се изземаат индивидуалните објекти што се градени без одобрение. Овој член му дава можност на градежниот инспектор да даде забрана за оттуѓување на нелегалните делови од градбите, како и забрана за располагање со градбата и земјиштето до моментот на постапување по одобрението за градба. Забраната овозможува заложно право и конфискација на државата врз градбата и земјиштето доколку во рок од три години инвеститорот не постапи според одобрението за градба. Во меѓувреме инвеститорот ќе плаќа месечни пенали во износ од три проценти од пазарната вредност на градбата и земјиштето.

Изземањето на индивидуалните домови следуваше по реакциите на пратениците од СДСМ и од НСДП, кои бараа целосно бришење на член 138 или наместо одземање на имотот и земјиштето, задолжително уривање на нелегалната градба. Тие оценија дека со можноста за плаќање пенали се ставаат во нерамноправна положба оние кои градат законски. Пратениците од власта сметаат дека член 138 ќе ги спречи новите дивоградби. (МИА)