Реакции - Виновниците имаат име и презиме

Мисијата на ЕУ побара надлежните да си ја вршат работата, без оглед на етничката и верската припадност на жртвите и на извршителите

„Албанците не можат да прифатат колективна одговорност за убиства на деца, криминал за кој не се сеќавам дека се случувал во нивната историја дури ни во време на војна. Нашата заложба како политички субјект, останува давање максимален придонес во идентификувањето на убијците по име и презиме, без разлика на која националност и' припаѓаат. Тие се само убијци и ништо повеќе“, изјави портпаролот на ДУИ, Бујар Османи. Тој смета дека Албанците се повеќе заинтересирани од кој било за откривање на сторителите.

„Се надеваме дека завчерашната акција на безбедносните служби ќе даде голем придонес за идентификување и обезбедување материјални докази за целосно расветлување на ова злосторство“, се огласија од опозицискиот СДСМ. Тие уште еднаш изразија поддршка до МВР и безбедносните служби за брзо идентификување на сторителите, обезбедување материјални докази и целосно расветлување на петкратното убиство.

Мисијата на ЕУ во Скопје побара надлежните да си ја вршат работата без оглед на етничката или верската припадност на жртвите и извршителите.

„Запознаени сме дека истрагата за петкратното убиство кај Смилковското езеро доведе до одредени апсења. Продолжуваме одблиску да ги следиме активностите. Работа е на државните институции да ги извршуваат нивните дејности, без оглед на етничката или верската припадност на жртвите и на извршителите. Останува мирно да сочекаме судските органи да донесат правилни одлуки во разумен временски рок“, се наведува во соопштението од Делегацијата на ЕУ во Скопје.

И од Националната демократска преродба, партијата на Руфи Османи, побараа правната држава да го расветли случајот до крај и на виновниците да им изрече заслужена казна. Сепак, сметаат дека „претресувањата на десетина куќи во Гази Баба, Хасанбег, Арачиново и Отља, како и апсењето на 20 лица меѓу кои и еден старец и една старица, сите Албанци, не може да се квалификува како успешна акција, а уште повеќе го оправдува називот на акцијата ‘Монструм‘“. Реагираат дека според доказите што биле презентирани на завчерашната прес-конференција на МВР, било јасно дека истрагата била водена во погрешен правец и оти не биле фатени вистинските злосторници.

„Обидот проблемите од криминален план да се поместат на верски план, не само што се неприфатливи, туку се многу опасни за безбедноста во земјата и во регионот и можат да бидат повод за нов синџир на насилство каде што би настрадале недолжни граѓани независно од нивната етничка или верска припадност“, реагираа вчера од НДП.

Од амбасадата на САД во земјава апелираа граѓаните да останат мирни, а правдата да биде задоволена, со тоа што секој виновник, без оглед на верската и етничката припадност, ќе добие заслужена казна. (Г.А.)