Мое ќоше

Страв од Љупчо Геор��иевски

Ерол Ризаов

Некој смртно се плаши Љупчо да не се врати на голема врата

Ја гледам онаа трагикомична фигура како му предлага на Љупчо Георгиевски да ја прекрсти партијата во СДСМ Народна. Прво што ми падна на памет е: како можеше дотаму да утне Георгиевски и да донесе човек за свој претседател кој за 24 часа прави салто мортале да не може ни мајка му да го препознае. Величествени се трансформациите на некои човеци во транзицијата. Тоа се вистински ремек-дела на стотици нијанси, најразлични бои и фарби во една личност. Што се' не искажа некогашниот претседател на ВМРО-Народна опевајќи го Георгиевски. Најимпресивен беше кога ни соопшти дека најубавото време за граѓаните на Македонија било во периодот на владеењето на Љупчо Георгиевски, за веднаш по пресадувањето патриотска генетика да го препознае најголемиот предавник во истиот човек. Е, ова се вика вистинска преродба. Сето ова и би поминало како лесна забава од типот на Чичолина во политиката ако не се замешаше во најстариот занает и судот, кој практично го врати стариот претседател на партијата иако тој јавно ја напушти. Судот не ги призна одлуките на партискиот конгрес на кој Љупчо Георгиевски е легално избран за претседател на партијата. Тешко е да се поверува дека е во прашање некаква формално правна заврзлама.

Некој смртно се плаши Љупчо да не се повампири и да не се врати на голема врата на политичката сцена. На последните парламентарни избори ВМРО-ДПМНЕ направи специјална воена стратегија одејќи од куќа во куќа, од човек на човек да не влезе во парламентот нејзиниот основач, човекот што ја основа ВМРО-ДПМНЕ. Тоа преродбениците го одработија успешно. Велат, платена е висока цена, ама се исплати, оти вмровската икона како божјото чудо во „Св Димитрија“ почнала пак да зрачи. Затоа Георгиевски треба да се мрази од дното на душата оти премногу ги потсетува вмровците на минатото. Денешното ВМРО-ДПМНЕ ги брои годините од четвртиот век пред нашата ера од времето на Филип Втори и Александар Македонски и од 2006 година кога почнува нашата ера, од доаѓањето на власт на Никола Груевски.

Се чини има нешто многу тегобно за Никола Груевски што некако наеднаш и во исто време распали со силни канонади кон политичките противници и во неговите редови и во опозицијата. Прво го пушти „новиот бран“ кој се' уште фрла далги само до колена, а потоа заедно со министерката Гордана Јанкулоска жестоко распалија дека откако СДСМ е во опозиција, на Македонија и' оди добро и дека секогаш кога полицијата има голем успех, СДСМ е на страна на криминалот. Ова, сепак, е малку поинвентивно отколку старата песна дека дојдовме до ова дереџе затоа што СДСМ и Бранко Црвенковски владееле 20 години со Македонија. Сега кога веќе не може да се скрие дека во изминатите 21 година ВМРО-ДПМНЕ е една година повеќе на власт отколку СДСМ и откако е лесно докажливо дека во последните 15 години ВМРО-ДПМНЕ е 10 години на власт, тогаш најдобро дереџето да биде сменето. Она што до вчера беше лошо и за никаде поради долгото владеење на опозицијата, денеска е ептен добро, бидејќи опозицијата веќе седум години со волја на народот е отстранета од власта. Оваа партиска трансформација е уште почудесна од онаа на поранешниот претседател на ВМРО-Народна, извесниот Додовски. Значи, пазете прво во државата на едноумието ништо не чинеше, потоа дојдоа социјалдемократите и уништија се', па дојдоа преродбениците и изградија се' и сега на сите ни е ептен добро.

Деновиве чaкам да се огласи Институтот „Павел Шатев“ со најново непристрасно истражување на јавното мислење кога рејтингот на ВМРО-ДПМНЕ и на Груевски ќе порасне уште за неколку проценти, малку ќе се намали на ДУИ, но ќе биде над ДПА. Се' уште оние што не знаат и не веруваат никому ќе бидат најмногубројни, но засега тие не се битни. Важно е Груевски и натаму да има рејтинг од само 27-28 проценти, но поголем од сите политичари заедно, а ВМРО-ДПМНЕ да биде со трипати поголема поддршка отколку СДСМ. Научниците од „Шатев“ не мора да се мачат воопшто да ја прават анкетата и да арчат пари. Таа е готова и стокмена само треба да се јават во комуникацискиот центар на ВМРО-ДПМНЕ и кај агилниот директор и веднаш ќе ги добијат сите резултати на маса со мала веројатност на грешка.