14.07.2012, 17:03 Антигона вечерва го отвора фестивалот „Стоби“
На 11. Фестивал на античка драма ќе се натпреваруваат три претстави од Македонија и три од Турција, Данска и Хрватска
Вечерва, во 21 часот, на прекрасниот антички локалитет Стоби ќе се отвори 11. издание на Интернационалниот фестивал на античка драма, кој до 28 јули ќе донесе шест претстави од четири земји. Отворањето ќе го одбележи Националниот турски театар од Истанбул, со едно поинакво видување на „Антигона“ на Софокле, чија адаптација и режија ја потпишува Кенан Ишик.
Годинава во конкуренција се шест претстави, со тоа што три доаѓаат од Македонија, а три се од Турција, Данска и Хрватска. Данскиот театар на Бети Нансен на 23 јули ќе ја донесе модерната верзија на „Електра“. Режијата на оваа претстава со брзо темпо е на Никлас Бендиксен, кој го преработил текстот на Софокле заедно со Мете Волф Иверсен, а ја осмислува и сценографијата. Интересно е дека главната улога и е доделена на српско-данската актерка Маријана Јанковиќ.
Од Хрватска, пак, доаѓа Народниот театар од Вараждин, кој на 25 јули ќе ја одигра „Комедијата за лончето“ или „Аулуларија“ во режија на Борис Кобал. Оваа претстава се игра врз база на преводите на Плутовата „Аулуларија“ на два јазика: словенечки и кајкавски. Инаку, Аулуларија го претставува ликот на скржавецот во светската драма, подоцна преземен од големиот комедиограф Молиер.
Од Македонија ќе можат да се видат и „Одбраната на Сократ“ на Театарот на еден актер, со Бајруш Мјаку во главната улога, а во режија на Дритро Касапи и Дино Мустафиќ, како и извонредната битолска „Медеја“, која ќе се одигра последниот ден, 27 јули. Извонредниот текст на Хајнер Милер го поставува Нада Кокотовиќ, а главната улога и е доверена на впечатливата Јулијана Мирчевска. Главните теми во „Медеја“ се односот меѓу мажите и жените, љубовта и омразата, предавството, додека Милер ја претставува Медеја како одмаздничка, како варварка, робинка, кучка, ѓубриште, лик - ни маж ни жена.
Сите претстави се закажани во терминот од 21 часот. Но, да потсетиме и дека Фестивалот годинава тргна со навистина голема амбиција, не само тематска, туку и амбиција да се прошири на целиот овој централен, односно Вардарски регион, поврзувајќи се и со другите градови. Во одржувањето на фестивалот од лани како мецена влезе и винаријата „Стоби“, од каде што најавија дека имаат заедничка цел, во поглед на промоцијата и развојот на овој регион. И, секако, за зачувување на традицијата на античкиот театар.
|
