(ОБНОВЕНО) „Охридско лето“ отворено со задоцнување од час и половина

Поради силниот дожд во Охрид, театарскиот ораториум „Ромео и Јулија“ почна 90-тина минути подоцна од предвиденото

Охрид - Со задоцнување од час и половина поради невремето и силниот дожд што го зафати Охрид, со театарскиот ораториум „Ромео и Јулија“, вечерва во Античкиот театар почна 52. издание на „Охридско лето“.

Во режија на Дејан Пројковски, продукцијата на овој проект е на „Охридско лето“ и Народниот театар од Битола, а како копродуценти се јавуваат: Македонската опера и балет, театарот „Вера Комисаржевска“ од Санкт Петербург, Русија и Народниот театар од Охрид.

Најголемата музичко-сценска манифестација во земјата за отворена ја прогласи најзиниот покровител, претседателот на Република Македонија Ѓорѓе Иванов, поздравувајќи ја неколку илјадната публика во Античкиот театар во Охрид, додека пораката на уметниците ја пренесе нашиот познат режисер Јордан Плевнеш.

Фестивалот почна - Пред нас е уште едно лето посветено на уметноста. Уште едно „Охридско лето“ исполнето со музика, драма, танц, рече Иванов во обраќањето и потсети дека повеќе од половина век фестивалот претставува дом на македонската, европската и светската уметност во кој реномираните уметници од целиот свет секогаш одново се враќаат за да ги споделат своите моменти на инспирација со верната публика. (Т.И.)