Почна 10.Пиво фест во Прилеп

Гостите синоќа ги забавуваа  „Конкверинг лајонс”, „Капс”, „Дубиоза колектив” и гостинот од Јамајка Рас Захари

Во Прилеп синоќа и официјално беше отворен десетиот по ред Фестивал на Пивото „Пиво фест 2012”.На големата бина во центарот на градот прво со натпревар во пиење пиво и со настап на повеќе музички групи беше официјализирана веселата фестивалска атмосфера.

Градоначалникот на Прилеп Марјан Ристески по овој повод нагласи дека фестивалот е вистински бренд на градот, а во четирите фестивалски дена гостите ќе имаат можност да ги видат сите знаменитости и да понесат убави спомени.

На штандовите на околу 5.000 метри квадратни гости имаше од повеќе краишта на Македонија и од Србија, Хрватска, а сообраќајот се одвиваше без проблем. Забрането е возењето во централното подрачје, но затоа сите се упатуваат на предвидените паркинг простори.

Поголема посетеност се очекува вечер, посебно за време на викендот.

Гостите синоќа ги забавуваа повеќе групи, меѓу кои и „Конкверинг лајонс”, „Капс”, „Дубиоза колектив” и гостинот од Јамајка Рас Захари.

За вечер е предвиден настапот на Влатко Стефановски, Есма Реџепова, Кирил Џајкоски, Кросроуд блуз бенд.

Поради големиот интерес да се патува деновиве во Прилеп, „Македонски железници” имаат и вонреден возен ред. Како што се соопштува, вонредниот воз е в сабота и во недела. Од Скопје ќе тргнува во сабота и недела во 11.00 часот. Од Прилеп кон Скопје возот ќе сообраќа во недела и понеделник во 1,20 часот по полноќ.

- Сакаме да ги информираме патниците дека кон Прилеп, во деновите на „Пиво фест“, сообраќаат и редовните патнички возови кои од Скопје кон Прилеп тргнуваат во 6.48, 14,30, 17,10 и 19,30 часот, а во повратен правец од Прилеп за Скопје во: 3.49, 6.10, 13.35 и 19.24 часот, стои во соопштението на „Македонски железници”. Патниците од Битола кон Прилеп можат да ги користат возовите во 3.10, 5.30, 12.45 и 18.35, а во обратен правец од Прилеп за Битола возовите во: 9.39, 17,12, 19.26 и 22.25 часот.