Обама лично помагал за името

И преговорите зад кулисите, според Вашингтон, не дале резултат што може да помогне во Чикаго

ВАШИНГТОН – Специјалниот помошник на претседателот Обама, Елизабет Шервуд Рандал изјави дека администрацијата на Обама „напорно работи зад кулисите“ за решавање на пат позицијата меѓу Македонија и Грција, вклучувајќи го и самиот претседател кој е инволвиран во „дискусии со засегнатите страни“.

Меѓутоа, според неа, нема индикации за напредок и за тоа дека Грција ќе ги испочитува обврските и меѓународното право и ќе престане да го блокира членството на Македонија во НАТО во врска со проблемот со името.

Елизабет Шервуд-Рендал е виш директор за Европа и член на Националниот совет за безбедност.Таа изјавата ја даде на трибината во Вашингтон на тема „Ревитализирањето на НАТО: Од Лисабон до Чикаго“.

„Ние многу напорно работевме зад кулисите за да најдеме решение за пат позицијата во однос на прашањето со името. Претседателот размислува за многу прашања што треба да ги знае како претседател - а едно од тие е македонското прашање со името. Тој беше инволвиран во дискусиите со засегнатите страни во овој проблем, и за жал тоа не е решено навреме за самитот на НАТО во Чикаго, но ние и понатаму се надеваме дека тоа ќе биде решено, па Македонија ќе може да го заземе своето место како членка на НАТО“.

Ова е прва изјава од САД со која се сугерира дека претседателот Барак Обама лично се ангажирал во спорот на Македонија, наспроти впечатокот во земјава дека САД се пасивизираа во однос на ова прашање и дека реакциите, писмата и петициите од дијаспората и од конгресмените не наидуваат на никаков одзив во Белата куќа. Улогата на Обама околу спорот за името практично беше невидлива од самитот во Стразбур, кога на изненадување на сите главната порака што ја прати беше токму околу нашата држава - дека едвај чека да ја види како членка на НАТО.

Шервуд практично потврди дека на овој самит нема да има ни такво охрабрување, бидејќи Вашингтон пробал да помогне и не успеал во тоа. Наедно со нејзината изјава се префрла топката пак на наш терен, бидејќи решението на блокадата се посочува кај Македонија, а САД се става во улога само на олеснувач, иако Македонија очекува многу повеќе од тоа, пред се' да застане зад одлуката на меѓународниот суд на правдата и критериумите за прием на алијансата. (Н.Р.)