Родителите на 1.500 основци ќе заработат прекршочна пријава
Родителите ќе мора да платат 1.000 евра ако не ги запишат своите деца во средно во наредните две недели
Жаклина Хаџи-Зафирова
Родителите на околу 1.500 основци ќе мора да ги олеснат своите џебови за 1.000 евра ако не ги запишат своите деца во средно во наредните две недели. Ова предупредување вчера стаса од Министерството за образование и наука, кое постојано го пролонгира рокот за пријавување на завршените основци во средните училишта, сакајќи да докаже дека може да се оствари нивниот проект за стопроцентна опфатеност на учениците во средното образование. Најновиот рок што им го постави Министерството на родителите на идните средношколци е 15 октомври како последна шанса, бидејќи по овој рок ќе почне да поднесува прекршочни пријави адресирани на име на родителите или старателите на учениците.
Министерството за образование, сепак, не гледа толку црно на бројката на незапишани ученици и го смета за успех досегашниот број на запишани во средните училишта, за што велат дека овој процент годинава е за четири проценти поголем отколку лани. Законските одредби предвидуваат со 1.000 евра да бидат казнети родители кои нема да ги запишат своите ученици ако тие се малолетни, додека казната за полнолетните е малку помала и изнесува 800 евра.
„Во овој период се одвива комуникацијата меѓу основните, средните училишта и родителите на оние ученици што треба да се запишат во средно, што очекуваме да заврши до 15 октомври.
По овој рок на известување на семејствата дека е потребно да се вклучат децата во средното образование ќе мора да се примени законската одредба за поднесување прекршочна пријава“, вели Ѓорѓи Николов, директор на Државниот просветен инспекторат во Министерството. Тој појаснува дека веќе е истечен триесетдневниот законски рок за поднесување прекршочни пријави за родителите кои досега не ги запишале децата, бидејќи учебната година веќе е почната. Николов очекува дека сите полуматуранти ќе продолжат со своето образование.
Во Министерството за образование посочуваат на податоците кои велат дека годинава 25.700 ученици се опфатени во средното образование или 94,5 отсто, што е за четири проценти повеќе од лани, кога во средно биле опфатени 23.869 ученици. „Годинава имаме помал број ученици, односно 1.500, што се' уште не се запишале во средно, што е помалку во споредба со минатата година“, вели портпаролката во Министерството за образование, Маја Корубин.
Во светот над 75 милиони деца се надвор од образовниот процес. Со оваа бројка излезе вчера УНИЦЕФ, од каде што објавија дека најголемиот дел од децата што не одат на училиште се девојчиња, кои никогаш не виделе како изгледа училиште. Според нивните податоци, од децата што се запишуваат, само половина го продолжуваат школувањето по четвртото одделение во основно училиште.
|
