Ештон ја избегна Нобеловата церемонија

Ги отфрли апелите да оди во Осло како знак на пркос кон кинеската дипломија

БРИСЕЛ - ЕУ-комесарот за надворешни работи, Кетрин Ештон, ги отфрли апелите од водечки европарламентарци упатени до неа денес да присуствува на церемонијата на доделување на Нобеловата награда за мир во Осло, како знак на пркос кон кинеската дипломатија.

„... ЕУ ќе биде претставена на нормален начин од шефот на делегацијата на ЕУ, кој ќе биде придружуван од сите 27 амбасадори на земјите-членки на ЕУ во Норвешка. На ова се согласија сите земји-членки и ова е нормална позиција“, изјави Дарен Енис, портпаролот на Ештон, во средата за „ЕУ обсервер“ .

Соопштението е одговор на апелите од колидерот на Групата на зелените во Европскиот парламент, францускиот европарламентарец Даниел Кон Бендит, до Ештон да покаже поддршка за победникот, кинескиот дисидент Лиу Ксијаого. „Ако Ештон каже дека сака да учествува во церемонијата за доделување на Нобеловата награда, властите во Осло нема да и го спречат влезот во земјата ниту, пак, Комитетот за Нобелова награда ќе ја остави надвор на студот. Прашање на нејзина волја да оди и да направи гест дека Европа се залага за почитувањето на човековите права и слободата на изразувањето“, рече тој во репликата на ставот на Ештон.

Норвешкиот Нобелов институт во вторникот забележа дека 44 амбасади досега се изјасниле дека ќе испратат делегати на гала-церемонијата, 19 амбасади ги одбија поканите, а две се' уште не одговориле. Деветнаесетте амбасади што ја одбија поканата се: Кина, Русија, Казахстан, Колумбија, Тунис, Саудиска Арабија, Пакистан, Србија, Ирак, Иран, Виетнам, Авганистан, Венецуела, Филипини, Египет, Судан, Украина, Куба и Мароко. Алжир и Шри Ланка се' уште не одговориле.

Европската комисија во средата соопшти дека е „многу разочарана“ што Србија, земја-апликант за ЕУ, се одлучи да се стави себеси во групата земји, како што се Куба и Иран, против заедничкиот став на ЕУ. (ЕУ обсервер)