Јосип Куже претрпе мозочен удар

Хрватскиот фудбалски стручњак на клупата на албанската репрезентација, Јосип Куже (57), претрпе мозочен удар и веднаш беше хоспитализиран во Американската болница во Тирана, објавуваат медиумите кај нашиот западен сосед.

„Засега не е позната тежината на ударот, но штом ќе му се стабилизира состојбата, Куже ќе биде транспортиран со авион во Загреб“, изјави Алиса Демолари, портпаролка на албанското Министерство за здравство.

Поранешниот тренер на загрепски Динамо го презеде кормилото на репрезентацијата на Албанија во мај минатата година по оставката на Холанѓанецот Ари Хан. Под негово водство Албанците забележаа одличен старт во квалификациите за Европското првенство во 2012 година. По воведните две кола, лидери се во групата Д со четири бода колку што има и Белорусија. Зад нив се селекциите на Франција со 3, БиХ (3), Романија (2) и Луксембург (0).

Албанија ќе биде последниот противник на нашиот најдобар фудбалски тим во 2010 година. Фудбалските федерации на двете земји постигнаа договор за тест, кој е закажан во Корча на 17 ноември. (С.Д.)